المُخبر الاقتصادي لماذا تصر بعض الدول على تأسيس صناديق ثروة سيادية وكيف تُدار ثروات الدول

من حوالي 14 سنة وتحديداً في 30 يونيو 2008 وزير الخزانة الأمريكي هنري بولسون كان بيزور روسيا علشان يناقش مواضيع لها علاقة بالتجارة والاستثمار مع الجانب الروسي المهم بولسون في اليوم دا وهو قاعد مع رئيس الوزراء الروسي فلاديمير بوتين ميل عليه وقال له على فكرة الحكومة الأمريكية بترحب جداً بأي استثمارات لصندوق الثروة السيادي الروسي في الولايات المتحدة ساعتها بوتين استغرب وقال لبولسون بس إحنا ما عندناش صندوق ثروة سيادي أصلاً إنت غالباً متلخبط ما بينا وما بين حد تاني إحنا عندنا صناديق مختلفة بوتين كمل وقال بس إحنا مستعدين نعمل صندوق ثروة سيادي عادي جداً خصوصاً لو إنتوا عاوزين كدا وبالفعل روسيا أسست سنة 2008 أول صندوق ثروة سيادي بعد ما قسمت صندوق استقرار النفط بتاعها لصندوقين في الوقت اللي حصلت فيه المناقشة ما بين بولسون وبوتين كلمة صندوق ثروة سيادي ما كانش لها شعبية كبيرة أوي كمصطلح زي ما هو حاصل النهار دا لكن العالم وقتها كان فيه العشرات من صناديق الثروة السيادية وأشهرهم طبعاً صندوق الثروة السيادي النرويجي بعد روسيا فيه دول كتير مشيت في نفس الاتجاه وأسست صناديق ثروة سيادية لنفسها لحد ما وصل عدد الصناديق دي النهار دا لما يقرب من 100 صندوق وكلمة صندوق ثروة سيادي النهار دا بقت منتشرة بشكل كبير وبنسمعها طول الوقت في وسائل الإعلام المختلفة ودا بيطرح أسئلة من نوعية إيه هي حكاية صناديق الثروة السيادية؟ الصناديق دي عبارة عن إيه بالضبط؟ وظهرت إزاي وإمتى؟ وإيه هي وظيفتها أو الهدف من تأسيسها؟ وبتجيب فلوسها منين؟ وعوائدها بتروح لمين؟ وهل هي مهمة فعلاً؟ يعني هل ممكن صندوق ثروة سيادي ينقذ بلد من الضياع أو يقودها ناحية الثراء؟ دا جزء من اللي حندردش فيه مع بعض في حلقة النهار دا أنا أشرف إبراهيم ودا المخبر الاقتصادي+ من حوالي 16 سنة وتحديداً في منتصف سنة 2006 ما يقرب من 600 ألف طالب من الطلاب في تشيلي نزلوا عملوا مظاهرات كبيرة جداً في شوارع العاصمة سانتياغو المظاهرات دي بدأت بالطلاب ولكن بعدين تحولت لمظاهرات شعبية الناس كلها بتطالب فيها الحكومة بإنها ترفع حجم إنفاقها وتصرف عليهم جزء أكبر من العوائد الكبيرة اللي حققتها من الارتفاع الكبير جداً اللي حصل في قيمة صادراتها من النحاس في الوقت دا للي ما يعرفش منكم تشيلي هي أكبر مصدر في العالم للنحاس البلد دي اقتصادها قايم في جزء كبير منه على النحاس من الآخر كدا تقدر تقول إن النحاس بالنسبة لتشيلي زي النفط بالنسبة للنرويج أو المملكة العربية السعودية المهم في الفترة ما بين 2003 و2006 السعر العالمي للنحاس تضاعف 4 مرات بسبب الطلب الكبير على المعدن في الوقت دا خصوصاً من الصين ودا كسب الحكومة التشيلية أرباح بعشرات المليارات من الدولارات الناس بقى في المظاهرات كانوا بيقولوا لحكومة ميشال باشليت رئيسة البلد في الوقت دا واللي كانت لسة ماسكة المنصب ما بقلهاش كام شهر إحنا فين نصيبنا من الميغة دي؟ إنتوا لازم ترفعوا حجم الإنفاق الحكومي من خلال دعم التعليم المجاني ورفع المعاشات وغيره.. وغيره.. وغيره الحكومة التشيلية على الناحية التانية بقى كانت رافضة الكلام دا وكانت بتقول للناس الأمور مش بتمشي كدا مش اللي ناخده باليمين نصرفه بالشمال على سبيل المثال بولينا فيلوسو رئيسة ديوان رئيسة الجمهورية قالت إحنا ما ينفعش نصرف الفلوس الكتير اللي دخلت لنا وكأننا حنفضل طول عمرنا نحقق نفس الإيرادات لكن الناس ما كانش عاجبها الكلام دا خالص في استطلاع للرأي تعمل في مايو 2006 تلتين الشعب التشيلي قال إن الحكومة لازم تستخدم العوائد الكبيرة اللي حققتها من النحاس في تعزيز الإنفاق وكانوا رافضين فكرة الادخار الناس باختصار كانوا شايفين إن الحكومة بخيلة وبتفضل بدون سبب وجيه الادخار على الإنفاق وهاجموا ميشال باشليت رئيسة الجمهورية اللي كانوا لسة مكسبينها الانتخابات الرئاسية في يناير من نفس السنة ولكن أكتر واحد في الحكومة تهاجم وتشتم هو وزير مالية تشيلي ساعتها أندريس فيلاسكو لدرجة إن المتظاهرين كانوا بيجيبوا صورته ويحرقوها طيب ليه الهجوم على أندريس فيلاسكو بالتحديد؟ باختصار لإن فيلاسكو بصفته وزير المالية كان هو بنسبة كبيرة اللي كان بيتحكم في أوجه إنفاق الدخل الكبير اللي حققته تشيلي من صادراتها من النحاس وجهة نظر الراجل دا هو إن تشيلي بأي شكل من الأشكال ما ينفعش تستجيب للمطالب الشعبية اللي بتدور حوالين رفع حجم الإنفاق في البلد بنسب كبيرة استناداً لإيرادات الحكومة من النحاس ودا باختصار لإن إيرادات النحاس كانت ساعتها بتشكل ما يقرب من 60% من ميزانية الحكومة ودا بيخلي البلد معرضة بشكل كبير لمخاطر تقلب الأسعار العالمية للنحاس يعني أيوة إحنا الدنيا حلوة معانا في آخر كام سنة وعملنا شوية فلوس زي الفل لكن لو بكرا الصبح أسعار النحاس اللي إحنا كبلد بنعتمد على إيراداته بشكل كبير وقعت يبقى حنتشلوح كلنا مش عازين نبقى أضحوكة ونقع في نفس الفخ اللي وقعت فيه الأرجنتين والمكسيك جيرانا وبالتالي لازم الفلوس اللي معانا دلوقت نديرها بذكاء حلو أوي الكلام دا طب حنديرها صح إزاي يا سيادة الوزير؟ قال لك وهي دي عايزة كلام إحنا الفلوس دي حننفق شوية منها على الناس لكن الجزء الأكبر حنحطه في صناديق الثروة السيادية بتاعتنا علشان نحافظ عليها من ناحية ونشغلها ونكسب منها من ناحية تانية في نفس السنة اللي حصلت فيها الدوشة اللي هي 2006 الحكومة التشيلية أقرت قانون اسمه قانون المسؤولية المالية بموجب القانون دا تم إنشاء 2 من صناديق الثروة السيادية الصندوق الأول هو صندوق احتياطي المعاشات التقاعدية PRF واللي انطلق في آواخر 2006 والصندوق التاني هو صندوق الاستقرار الاقتصادي والاجتماعي والمعروف اختصاراً بـ ESSF واللي تم تأسيسه في أوائل 2007 الحكومة التشيلية بدأت توجه الجزء الأكبر من عائداتها من النحاس للصندوقين دول وفي المقابل الصندوقين ملتزمين بحاجتين أولاً تمويل التزامات المعاشات التقاعدية والرعاية الاجتماعية في البلد ثانياً دعم الاقتصاد التشيلي في حالة تورطه في انكماش لا قدر الله في إطار الاتفاق دا الحكومة حطت في الصندوقين الفائض اللي حققته في 2007 واللي كان بيعادل تقريباً 4 أضعاف الفائض اللي حققته قبلها بـ 4 سنين وفضلت مكملة على النهج دا في 2007 و2008 حتى في عز الأزمة المالية العالمية والناس برضو كانت مخنوقة من الحكومة اللي كانت ماسكة إيدها رغم الفلوس الكتير اللي كانت بتكسبها لكن فجأة الناس ما بقتش زعلانة ووزير المالية فيلاسكو اللي كانوا بيشتموه بقى في نظر الناس بطل الشعب وأفضل من أنجبت تشيلي وفيلاسكو يا بلاش واحد غيره ما ينفعناش إيه بقى اللي حصل بالضبط خلى الناس تقلب القلبة دي؟ حقول لك في نص 2009 حصل اللي فيلاسكو كان خايف منه وعامل حسابه الأسعار العالمية للنحاس انخفضت بأكتر من 50% في خلال كم شهر بس والهزة دي في العادي كانت حتبقى ضربة قاتلة لاقتصاد قايم على إيرادات النحاس زي الاقتصاد التشيلي المهم في اللحظة دي جا دور صناديق الثروة السيادية بمساعدة صندوق ESSF وأخوه PRF الحكومة التشيلية قدرت تضخ في الاقتصاد التشيلي حزمة تحفيز قيمتها بتقترب من 4 مليار دولار أو ما يعادل 2.8% من الناتج المحلي الإجمالي للبلد الحزمة دي كانت أعلى بمرتين أو 3 مرات من الحزم اللي أقرتها الحكومات التانية في أمريكا اللاتنينية والأكتر من كدا هي إنها كانت بتتفوق حتى كنسبة على حزمة التحفيز الأمريكية اللي كانت بتعادل 2% من الناتج المحلي الإجمالي الأمريكي بفضل خطة التحفيز دي تشيلي نجت من كارثة محققة وقدرت تحتوي الهزة الاقتصادية العنيفة اللي تعرضت ليها وعانت بس من ركود طفيف بعد انكماش ناتجها المحلي الإجمالي بحوالي 1.1% ودي معجزة بالنظر إلى إن إيرادات الحكومة خلال السنة دي انهارت بشكل كبير بعد تراجع أسعار النحاس علشان كدا فيلاسكو لما ساب منصبه كوزير للمالية في مارس 2010 كان بيتمتع بأكبر شعبية تمتع بها أي وزير في آخر 20 سنة في تشيلي فجأة الراجل دا تحول من شرير لبطل لما الناس فهمت جدوى سياساته وسبب إصراره على جعل صناديق الثروة السيادية جزء مهم في إدارة المشهد الاقتصادي في البلد وفي الحقيقة الكلام اللي فات دا كله ياخدنا لسؤال بديهي جداً كان المفروض نسأله من البداية خالص والسؤال بيقول هي إيه صناديق الثروة السيادية دي أصلاً؟ عبارة عن إيه يعني وحكايتها إيه؟ بص يا سيدي كلمة صندوق ثروة سيادي Sovereign Wealth Fund أو هي كلمة جديدة نسبياً يعني من 20 سنة مثلاً ما كانش فيه حاجة اسمها كدا أول واحد قدم المسمى أو المصطلح دا للناس كان هو أندرو روزانوف المسؤول التنفيذي السابق في شركة الخدمات المالية الأمريكية الشهيرة ستيت ستريت ودا كان في ورقة نشرها في Central Banking Journal في مايو 2005 تحت عنوان Who holds the wealth of nations? أو من يملك ثروات الأمم؟ دي كانت أول مرة يظهر مصطلح صندوق ثروة سيادي لكن هل دا معناه إن ما كانش في صناديق ثروة سيادية قبل كدا؟ صناديق الثروة السيادية كهيكل إدارة وكوظيفة كانت موجودة قبل كلام روزانوف بعشرات السنين يعني أول وأقدم صناديق الثروة السيادية في العالم هو مجلس الاستثمار الكويتي اللي الكويتيين أسسوه في فبراير سنة 1953 في العاصمة البريطانية لندن بقرار من أمير الكويت وقتها عبد الله السالم الصباح ودا بغرض إنهم يستثمروا من خلاله الفوائض الكبيرة اللي بيحققوها نتيجة صادراتهم من النفط وبالمناسبة الصندوق دا اسمه تغير بعدها لمكتب الاستثمار الكويتي بعد الكويت دول كتير جداً قلدتها ومشيت في نفس السكة وأسست صناديق ثروة سيادية خاصة بها النهار دا العالم فيه 100 صندوق ثروة سيادي تابعين لـ 70 دولة والصناديق دي بتدير أصول قيمتها بتتجاوز الـ 10 تريليون دولار أكبر الصناديق دي اعتباراً من يونيو 2022 كان صندوق الثروة السيادي النرويجي نورجس بنك إنفستمنت مانجمنت بإجمالي أصول بتقترب من تريليون و362 مليار دولار بعده مؤسسة الاستثمار الصينية بأصول قيمتها تريليون و222 مليار دولار بعده جهاز أبوظبي للاستثمار بقرابة 709 مليار دولار بعده هيئة الاستثمار الكويتية بحوالي 708.5 مليار دولار بعده GIC السنغافوري بـ 690 مليار دولار بعده صندوق الاستثمارات العامة السعودي بـ 620 مليار دولار بعده محفظة الاستثمار لمؤسسة النقد بهونغ كونغ بقرابة 589 مليار دولار بعده تماسيك هولدينغز السنغافوري بـ 496 مليار دولار بعده جهاز قطر للاستثمار بـ 461 مليار دولار وأخيراً في المركز العاشر صندوق المجلس الوطني للضمان الاجتماعي الصيني بأصول بتقترب من 447 مليار دولار دول أكبر 10 صناديق ثروة سيادية في العالم النهار دا ودا يرجعنا تاني للسؤال اللي سألناه من شوية يعني إيه صندوق ثروة سيادي أصلاً؟ وإيه اللي بيميزه مثلاً عن الأنواع المختلفة التانية من الصناديق زي صناديق المعاشات التقاعدية مثلاً؟ بص يا سيدي صندوق الثروة السيادي هو كيان استثماري مملوك للدولة الدولة بتأسس الصندوق دا علشان تدير من خلاله فوائضها المالية الفوائض دي ممكن يكون مصدرها مثلاً ميزان المدفوعات أو الميزان التجاري أو عوائد خصخصة شركات حكومية أو أي شيء من هذا القبيل وهنا ضروري ناخد بالنا من حاجة مهمة جداً صندوق الثروة السيادي في الغالب ما لهوش علاقة باحتياطيات البلد من العملات الأجنبية الاحتياطيات دي بتكون تحت تصرف السلطات النقدية ممثلة في البنك المركزي واللي بيستخدمها في إدارة السياسة النقدية للبلد دي فلوس ودي فلوس تانية خالص المهم الصناديق دي الحكومات عادة بتؤسسها لـ 5 أسباب الأول هو عزل الميزانية والاقتصاد عن أي تقلبات ممكن تحصل في إيرادات الحكومة زي ما حصل في تشيلي مثلاً في 2006 الحكومة كانت معاها فلوس بالكوم نتيجة ارتفاع أسعار النحاس لو الحكومة كانت ضخت كل الفلوس اللي كسبتها في الاقتصاد في صورة إنفاق مرتفع ما كانتش حتقدر تحافظ على المستوى دا من الإنفاق لفترة طويلة لإن الإنفاق دا مرهون بأسعار النحاس ولو كانت الحكومة سمعت كلام الناس وصرفت كل الفلوس اللي دخلت كانوا حياخدوا على قفاهم في 2009 لما أسعار النحاس انهارت وفقدت 50% من قيمتها ساعتها لو الحكومة التشيلية كانت ماشية بمنطق اللي تكسبه اصرفه كان مستوى الإنفاق الحكومي حينخفض بنسبة 50% ودي كانت حتبقى كارثة وهنا يجي دور صندوق الثروة السيادي الزايد عن حاجتك أو عن مستوى الإنفاق الطبيعي بتوديه الصندوق وبالتالي بتحافظ على استقرار الميزانية والاقتصاد ودا ياخدنا للهدف التاني وهو السيطرة على مستوى السيولة في السوق في النص الأول من السنة اللي إحنا فيها دي أسعار النفط طلعت فوق الـ 100 دولار للبرميل ودا عمل مكاسب كبيرة للدول المصدرة للنفط جزء كبير من الأرباح اللي الدول دي حققتها تم ضخه في صناديقها السيادية مش في الاقتصاد بشكل مباشر علشان يتجنبوا أي تأثير غير مرغوب فيه على مستوى السيولة في السوق الهدف التالت بقى هو تنمية أموال البلد وتعزيز قيمتها من خلال الاستثمار علشان بعدين توفر تمويل لأنشطة التنمية الاقتصادية والاجتماعية في البلد ويمكن أبرز مثال على دا هو سنغافورة سنغافورة الدولة الصغيرة جداً الموجودة في جنوب شرق آسيا واللي بتعتبر النهار دا تاني أغنى دولة في العالم بعد لوكسمبورغ واللي المواطن فيها بيتمتع بواحد من أفضل مستويات المعيشة وأكثرها رفاهية على ظهر الأرض حققت كل الإنجازات اللي هي فيها النهار دا بفضل صندوقين الثروة السيادية بتوعها GIC وتماسيك هولدينغز إزاي عملوها؟ أو إزاي دا حصل؟ وإيه هو دور الصندوقين في التنمية السنغافورية؟ دي قصة كبيرة يطول شرحها بتوضح مدى عبقرية وبعد نظر المسؤولين السنغافوريين ححكيها لكم في حلقة لوحدها بالتفصيل لو حابين نعمل الحلقة دي قريب عرفوني في التعليقات المهم نسيب سنغافورة ونروح للهدف الرابع من ورا تأسيس صناديق الثروة السيادية وهو دعم الاقتصادات الوطنية خلال فترات الأزمات والهزات الاقتصادية في 2020 زي ما إنتوا عارفين وباء كورونا أخد العالم كله على غفلة فجأة بقى في وباء والناس لازم تقعد في بيوتها والمصانع والأنشطة التجارية تقفلت والاقتصادات عانت من حالة من الشلل حرفياً في ظل الظروف دي الحكومة الأيرلندية زيها زي حكومات كتير كانت محتاسة وكانت في أشد الاحتياج للفلوس علشان تمول خطة الإغاثة الحكومية للأفراد والشركات اللي حالهم وقف في اللحظة دي تدخل صندوق الثروة السيادي الأيرلندي المعروف اختصاراً باسم ISIF وأدى الحكومة في مايو 2020 2 مليار يورو أو ما يعادل 2.4 مليار دولار علشان تمول خطة الإنقاذ بتاعتها في غياب الصندوق دا الحكومة الأيرلندية كانت حتحتاس نسيب أيرلندا ونروح للهدف الخامس والأهم من ورا تأسيس صناديق الثروة السيادية وهو حفظ حق الأجيال القادمة في ثروات البلد الحالية لما نجي نبص على مصادر رؤوس أموال صناديق الثروة السيادية في العالم حنلاقي إن معظم الصناديق في العالم مصدر رأس مالها إيرادات البلد من صادراتها من السلع أو الموارد الطبيعية يعني مثلاً السعودية والكويت والإمارات والنرويج النفط قطر بشكل أساسي الغاز تشيلي النحاس بتسوانا الماس كندا الكهربا كيريباس الفوسفات في دول تانية رؤوس أموال صناديقها مصدرها مش ثروات طبيعية زي سنغافورة مثلاً وزي أوغندا أوغندا عندها صندوق ثروة سيادي اسمه Poverty Action Fund الصندوق دا راس ماله مصدره المعونات والمساعدات من الدول الأجنبية لكن في النهاية الأغلبية الكاسحة من الصناديق دي مصدر ثروتها بشكل أساسي إيرادات الموارد الطبيعية وبالأخص النفط والغاز النفط والغاز معظم الدول اكتشفتهم في القرن الـ 20 وأوائل القرن الحالي وبتستهلكهم وبتبيع منهم من ساعتها وهنا بتظهر المشكلة النوع دا من الموارد هي موارد غير متجددة وبالتالي حتخلص في يوم من الأيام واليوم دا مش بعيد بالمناسبة إحنا ممكن على نهاية القرن دا لا يبقى في نفط ولا غاز خالص ودا بيطرح سؤال مهم جداً هل من حق الأجيال الحالية إنها تستفيد لوحدها من ثروات بلادها؟ الدول اللي بتعتمد على النفط والغاز النهار دا أو أي مورد طبيعي تاني أجيالها الجاية حتعيش إزاي لما الموارد دي تنضب أو تخلص؟ هنا بقى بيجي دور صندوق الثروة السيادي كوسيلة لحفظ حق الأجيال القادمة في ثروات البلاد الحالية بدل ما كل الفلوس اللي بتجي نفرتكها وقتي نشيل شوية على جنب ونستثمرهم للأجيال اللي جاية علشان ما تتظلمش وأنجح دولة في العالم قدرت تعمل دا من وجهة نظري هي النرويج في الحقيقة الهدف دا هو حفظ حق الأجيال القادمة من ثروات البلد كان هو المحرك الرئيسي ورا قرار الحكومة النرويجية بتأسيس صندوق ثروة سيادي بعد ما البلد اكتشفت النفط لأول مرة سنة 1969 بفضل الصندوق دا الشعب النرويجي النهار دا كله مليونيرات دي البلد الوحيدة في العالم االلي نقدر نقول إن شعبها كله مليونيرات صندوق الثروة السيادي النرويجي هو حالياً أنجح وأكبر صندوق ثروة سيادي في العالم قصة الصندوق دا حنحكيها بإذن الله في حلقة لوحدها لإنها تستحق على أي حال أنا كدا خلصت كلامي وكالعادة عندي سؤال لحضراتكم صندوق الثروة السيادي النرويجي كسب في 2021 176 مليار دولار بعد ما حقق عائد 14.5% على استثماراته علشان بس تكون معاي في الصورة الـ 176 مليار دولار دول مكسبه من استثماراته ودا برا خالص عن الدخل الطبيعي للبلد السؤال بقى برأيك هل ممكن تجربة الصندوق النرويجي تتكرر عندنا هنا في الوطن العربي وللا صعب؟ حتابع كل إجاباتكم في التعليقات وفي النهاية يا ريت لو عجبتكم الحلقة دي وحابين تشوفنا تاني اشتركوا في القناة واستنونا في حلقات جديدة بإذن الله سلام