Ramadan Lantern Story in Arabic Lila Stories

قصة فانوس رمضان كان ياما كان بقديم الزمان ولد صغير اسمو سامي عايش مع إمّو بالمدينة إمّو لسامي كانت مريضة وسامي وإمّو ما كان معن كفاية تتتحكّم الإم لأنّو البيّ توفّى لمّا كان سامي بعدو صغير وما كان عندن حدا يساعدن والحاكم كان ظالم وما كان يساعد الفقرا لهيك, سامي كان يشتغل حمّال تيقدر يطلّع لقمة عيشو هوّي وإمّو البيّ ما كان تاركلو لسامي ولا ورتة إلّا فانوس رفضان يلّي كان البيّ كمان ورتانو عن جدودو وكان فانوسو لسامي مشهور لأن شكلو وضوّو كانوا مميّزين كان يعطي ضو أصفر وأخضر وأحمر بنفس الوقت وكانو الكل يغارو منّو لسامي عجمال فانوسو كل رمضان كان ياخد سامي فانوسو ويضهر على السوق من بعد المغيب ويتسوّق شويّة خبز وأكل بالمبلغ الصغير لي بكون جمّعو بالنهار تيفطر هوّي وإمّو في ليلة برمضان... بيتلاقى هوّي وراجع عالبيت, وحامل فانوسو الشهير وجايب معو شويّة أكل, بختيارة على طرف الطريق بتطلب منّو الختيارة رغيف خبز لأنّو ما عندا شي تاكلو وأكيد سامي من كرمو بيعطيا وبس يوصل عالبيت بخبّر امّو شو صار معو، وبتقلّو إمّو بسيطة يا إبني, نحنا بس اليوم أكلنا بلا خبز في ناس دايماً أكلن بلا خبز أهم شي نساعد المحتاجين وبليلة ثانية من رمضان، ومن بعد نهار كتير تعّيب بيتلاقى سامي هوّي وراجع عالبيت برجّال عم يبكي عطرف الطريق بيعرف سامي انّو هالرجّال بيّ لأربع أولاد وما عم بلاقي شغل وما معو يجيب أكل لأولادو فبيعطيه سامي كل شي حاملو وبس رجع عالبيت بخبّر امّو وبتقلّو بسيطة يا إبني نحنا بس اليوم بلا أكل في ناس دايماُ عايشين بلا أكل أهم شي نساعد المحتاجين وعالسحور... بيوعى تيشرب ميّ لأنّو ناطرو نهار طويل بس ما بلاقي الفانوس ضاع الفانوس! بيضهر على الشوارع وببلّش ينبّش يمين شمال... ما في شي بيتلاقى بالمسحّراتي وبيسألو إذا شاف فانوسو بس المسحّراتي ما شاف شي وفجأة بلاحظ سامي ضوّ بعيد، برّات حيطان المدينة بيشبه ضو الفانوس تبعو مضوّى أصفر وأخضر وأحمر بنفس الوقت بصير يركض يركض... كلمّا يركض كلّما يقرّب أكتر وبس يصير كتير قريب بشوف فانوسو محطوط عصندوق قديم بيفتح سامي الصندوق وبلاقي كنز كبير ذهب وفضّة وألماس ولولو ومرجان وزمرّد وياقوت وكان في ورقة فتحها سامي وقرا بالإيمان والصبر والتواضع والعدل, ما في مستحيل وهيك تغيّرت حياتو لسامي وقدر يطبّب إمّو، ويساعد المحتاجين حواليه ومحبّة الناس خلّتو يصير الحاكم الجديد وحكم بعدل وبعدو لليوم... ما بيعرف سامي مين أخد الفانوس وشو قصّة الصندوق... بس لّي بيعرفو إنّو بالايمان والصبر والتواضع والعدل, ما في مستحيل وهيدي حكايتي حكيتا وبعبكن خبّيتا انطرونا بقصة جديدة