كيف يصبح في قلبي حب لله يحرق كل مالا يريده الله د محمد خير الشعال

ما الاسباب الجالبة للمحبة? شلون انا بدي يصير قلبي فيه نار تشتعل بحب الله وتحرق كل ما لا يريده الله عز وجل? الاسباب الجالبة للمحبة عشرة. هلأ انت احسن واحد بيناتنا اللي بياخد العشرة. اذا مو العشرة تسعة. اذا مو التسعة سبعة مو السبعة تلاتة مو تلاتة اتنين مو تلاتة مو اتنين واحد. بس هلأ لا سمح الله شاف هدون كلياتن صفر. فليعلم الحقيقة بان يعني حب الله في قلبه ليس موجودا. هو بيصلي نعم بصوم نعم بيحضر دروس نعم بس ناشف. هلأ في مؤمنون الحقيقة بصوم رمضان بس ناشف. ناشف ما في ولا ذرة حب. بيصلي نعم بس ناشف. ما في ولا ذرة حب. بيصلي. بس هلأ اذا راح على مؤتمر وقالوا له هلأ اجلنا الصلاة بلا صلاة. اذا قاعد مع رفقاته عم يتضحكوا ويلعبوا وصار وقت صلاة بقل لك هلأ بعدين بنساوي. هو في صلاة في صوم بس ما في حب. هلأ افضلنا يا اخوان من اجتمعت فيه هذه العشرة. مطلوب اليك انت ان تعزز هذا الحب في قلبك باستعمال هذه العشرة. حتى تصير من جماعة الذين يباهي الله تعالى بهم خلقه. ويقول والذين امنوا اشد حبا لله. الاسباب للمحبة عشرة. اولها قراءة القرآن بالتدبر والتفهم لمعانيه. من احب ان يكلم ربه فليقرأ القرآن. جلوسك مع القرآن الكريم. تفهمك لمعاني القرآن الكريم. تدبرك لمعاني القرآن الكريم. طيلة جلوسك مع كلام رب العالمين يصير لك به انس بحضرة الله عز وجل. بتصير بتستمتع بالقرآن الكريم. بتصير ترتاح للقرآن الكريم. تطرب لكلام حبيبك. سيدنا عثمان ابن عفان قالت لو قال لو طهرت قلوبنا لما شبعنا من كلام ربنا. في اناس بيناتكم يا اخوان الحمد لله رجالا ونساء يرتاحون للقرآن. يطربون للقرآن. فرحهم مع القرآن. هو عم يقرأ قرآن تلاقيه يبكي. هو عم يقرأ القرآن يضحك. هو عم يقرأ قرآن الكريم. يطمئن قلبه. هو عم يقرأ القرآن الكريم يتسع وتتسع مدارك عقله. بس هذا مو مو بيوم واحد. بدك مرة فمرة مرة فمرة حتى يصير لك انس بالقرآن الكريم. راحة بالقرآن الكريم. اخبرتكم عن واحد من الاخوة كان اه يشتغل بحفز القرآن الكريم. بيته بالقصور. يسمع القرآن الكريم بالشيخ محي الدين. قال لي بقيت ست سنوات. كل يوم كل يوم كل يوم. اصلي الفجر بجامع الشيخ محي الدين. لا في تكسي. ولا في سرفيس ولا في باص ولا في مسكليت. مشيت. من القصور للشيخ محي الدين. كل يوم كل يوم كل يوم. ست سنوات. هلأ اورثه الله في قلبه صلة عجيبة مع القرآن الكريم. اذا زعل وبده يرتاح بيقرأ القرآن. اذا افتقر وانهم وبده يذهب عن قلبه الهم بيقرأ القرآن. اذا تضايق بده يرتاح بيقرأ القرآن. فالقرآن انسه. والقرآن رفيقه. والقرآن يذهب همه وحزنه. بس هذا دافع الرجل. لذلك يا شباب يا رجال. واحد من الاخوة جاء الى المسجد. نحن عنا دورة يشفعان. بالمناسبة يا اخوان. نحن صرنا متفقين. انا يعني اسعى نسأل الله عز وجل ان يتقبل منا جميعا. انه نمشي مع بعض بعض. انا ما بهون علي ولا واحد بيناتكم رجلا كان او امرأة يبقى ارضا والاخرون يعني يحلقون. لما عم نيجي نقول والله نحن بدنا نقرا عشر تالاف حديث عن النبي صلى الله عليه وسلم كلنا بدنا نقرا. هلأ صار قريب شي اربعمية اخ. قرأ واخت. منيح. بس لسا باقيان عنا شي ميتين واحد. مانا تاركينكن ابدا. بدك تمشي معنا. يعني كلنا بدنا نطلع سوا. ما معقول كل من حولك عم يطلع وانت واقف في ارضك. لما عم نيجي نقول نتقن قراءة القرآن الكريم. نحن الله اكرمنا بدورة في المسجد اسما دورة يشفعان. من رمضان مو هادا الماضي اللي قبله. الحمد لله الاخوة قريب اربعمية اخ موجودين معنا. مع الاخوات كمان. موجودين مع النساء. طيب هلأ الحمد لله في اخوة جاءوا صفر بالقرآن كان. يعني في فحص مستوى هو وقراءته للقرآن فحصوه طلع صفر. وحطوه بالمستوى صفر. ما في مشكلة. بس الان في منهم حيصير مدرس. يعني كان صفر هلأ صار مدرس. واحد من هؤلاء الاخوة انت لما بتشتغل بالقرآن الكريم وبتبذل للقرآن الكريم القرآن الكريم يعطيك. هلأ هو جاء الى المسجد بدأ بقراءة هالقرآن وقراءته ليست جيدة ازن كان مستوى اول او تاني. ماشي الحال بس صار مستوى تالت صار مستوى رابع صار فيه ختمة الضبط تخرج من ختمة الضبط. الان اورثه الله تعالى حبا للقرآن. تعلق هيك بالقرآن. جزبوا القرآن الكريم. وحبا للمسجد. كان يسألني قبل ايام بان من حوله يريدون منه ان يسافر. بس هو لا يستطيع السفر. والسبب ان قلبه **** بالمسجد وبالقرآن. لكان كثرة قراءة قرآن تورثك حب يدخل الى القلب يخترق القلب. هلأ من حوله يا اخي سافر اذا سافرت في مصاري اكبر. اذا سافرت في رفاهية اوسع. اذا سافرت في اطمئنان اكبر. بس هو في بقلبه طمأنينة لا بد ان احرقك كل ما سوى كل ما سوى مراد المحبوب. لا عاد بده مصاري. ولا عاد بده رفاهية بده يبقى من يحب مع القرآن الكريم. ما الاسباب الجالبة للمحبة؟ عشرة واحد قراءة القرآن بالتدبر والتفهم لمعانيه. هلأ انا يا اخوان في باقيان بيناتكم كم اخ لهلأ ما سجلوا بدورك يشفع. وقراءتن للقرآن ما منيحة. هلأ اذا قراءتك للقرآن جيدة خلاص ما في مشكلة. اذا انت تقرأ عند شيخ عند استاز ما عنا حرج. بس انت قراءتك مو جيدة. ولا بتقرأ عند شيخ. ولا الك معلم. ولهلأ ما سجلت. انا تاركك. لحتى باذن الله بازن الله تصير كلياتنا هيك قراءتنا للقرآن الكريم ممتازة. كلنا بلا استثناء. بدي وقف شي يوم هيك والله مرة بواحد من الجوامع. جامع دك الباب. بعد هيك درس. اعطيتن مصاحف للكل. قلت لهن الله كل واحد جيب مصحف. افتحوا هالمصحف. كل واحد بده يقرا لي نص صفحة. يللي قراءته منيحة. الله معك. ببعتك عالبيت. مو منيحة. بدي خليك بهالجامع. لحتى تصير قراءتك منيحة. لانه كنت قايل لن ان يدرسوا ويقرأوا كثيرا. هلأ يا اخوان مانا تاركين. ولازم ولا واحد بيناتكم يترك لا صاحبه ولا رفيقه لا قريبه. انت بدك هلأ انا موكلكن كل واحد يمسك يلي جنبه. واذا قراءته مو منيحة يضله لحتى يساوي قراءته منيحة. حتى نتعاون في القرب الى الله عز وجل. هلأ دورة اشفعان الان في دورة جديدة. اطلع هلأ بعد الدرس روح سجل. في اوقات خمس اوقات ست اوقات سبع اوقات. موجودة الاعلام برا على باب الجامع. يعني اذا ما ناسبك اول موعد تاني موعد. تالت موعد. خامس بس المهم ان نرتفع كلنا بالقرآن الكريم. لانه نحنا بدنا نخلص التلاوة بدنا نروح هلأ نحنا بدأنا دورات تدبر للقرآن الكريم. كمان صار في هلأ اول دورة بدأنا فيا. بكرا بدنا نحط لكم منهاج. شو كلكم بدكن تروحوا باتجاه التدبر. حتى نمضي كلنا مجتمعين الى الله عز وجل. حتى اذا قلنا في في الفاتحة اهدنا الصراط المستقيم. اياك نعبد واياك اهدنا نكون فعلا عم نحكي عن بعضنا كلنا اهدنا. وبعدين بدنا نروح لجيرانا. نروح لمعارف نروح لمن وراءنا لنعمل بالدعوة الى الله. الاسباب الجالبة للمحبة عشرة. احدها قراءة القرآن بالتدبر والتفهم لمعانيه. الثاني التقرب الى الله تعالى بالنوافل بعد الفرائض. فانها توصله الى درجة المحبوبية بعد المحبة. كيف انا بدي يصير في بقلبي حب لله يحرق كل ما سوى الله عز وجل? بدك نوافل. لزلك منيح انت صليت تراويح عشرين ركعة. صليت قيام عشر ركعات. وصليت ضحى. وصدقت نافلة. وصمت بعد رمضان عم تصوم تنين وخميس منيح بس بدنا اياك تستمر. اقل اقل شي اربع ركعات قيام الليل في كل ليلة. اقل شي اربع ركع ضحى في كل يوم. صدق لك لا يمر عليك اسبوع الا مع صدقات. لا يمر عليك اسبوع الا مع صيام. ولا يزال عبدي يتقرب الي بالنوافل حتى احبه. يصير الله بحبك. كيف بده يصير والذين امنوا اشد حبا لله? بدك نوافل. واحد قرآن مع التدبر و اتنين النوافل. تلاتة. اسباب للمحبة. دوام ذكره على كل حال باللسان والقلب والعمل والحال. فنصيبه من المحبة على قدر نصيبه من الذكر. انتم تشاهدون يا اخوان اناس يمشون في الطريق. دائما التسبيح على لسانه. التحميد على لسانه. لا اله الا الله على لسانه. الله الله الله على لسانه. الصلاة على النبي صلى الله عليه وسلم على لسانه. ان لم يكن بلسانه. بتشوفوا اخوة واخوات ماسك هالعداد وعم بعد. منيح. ان لم يكن في العداد وفي المسبح في قلبه يذكر. في اخوة عندن ذكر الخطوة مع كل خطوة. ينبض قلبهم بذكر الله. ربط خطواته. استغفر الله. استغفر الله. استغفر الله. هيك. مشيه ربطه مع الذكر تسبيح تحميد تكبير صلاة على النبي صلى الله عليه وسلم. في اخوة الله بيكرمن يصلون الى مرتبة مع النفس يذكرون الله عز وجل. نحن يا اخوان صرنا متفقين في ورد اقل اقل اقل واحد بيناتنا في كل يوم. الف الف الف خمس تالاف. الف استغفر الله. الف صلاة على النبي صلى الله عليه وسلم. الف لا اله الا الله خمس الاف. الله الله الله. بدك تضلك تذكر الله عز وجل حتى يتمكن حب الله تعالى في قلبك. نيالك اذا تمكن حب الله في قلبك. لما كان حب الله في قلبك يا اخ الله وكيلك بتصير تطير الى مرضاته طيرانا. وانت مسرور. والله يعطيك اشياء لا تخطر لك على بال. والله بتصير اذا صليت ذقت طعم الصلاة. اذا صمت ذقت طعم الصيام. واحد من الاخوة قال لي والله يا استاز في رمضان. مو يوم اياما. قال لي والله في داخل النهار. اذوق في طعم فمي حلاوة. قلت له اكل شي. عم تاكل شي بنهار رمضان. ما عم ياكل بس الحب الذي ملأ قلبه صار يتذوق هو الصيام يا رجل اله طعمة. عرفت? صار يتذوق حلاوة هذا الصيام. هاي حلاوة غير حلاوة العسل وحلاوة الموز وحلاوة الكرز وحلاوة الفريز. حلاوة حب الله عز وجل لما بتصير في قلبك تنعكس على كل جوارحك. كيف بدك توصل للمحبة? الاسباب الجالبة للمحبة. قراءة القرآن بالتدبر. التقرب الى الله بالنوافل. دوام ذكر الله على كل حال. اربعة. ايثار محابه على محابك. عند الهوى. ادرب لما انت بتكون ماشي بالطريق فتمر فتاة نفسك تريد ان تدعوك الى النظر اليها. وربك يمنعك. اثر محاب الله على محابك. النظرة سهم من سهام ابليس مسموم. من تركها مخافة الله اورثه الله حلاوة يجدها في قلبه. حلاوة محبة الله عز وجل. يعرض عليك مال حرام. انا متأكد يا اخوان يا رجال كلكن. انا مرارا ما بيجيني. انا شفت متى ما صار الواحد عمره خمسة وعشرين ستة وعشرين سبعة وعشرين يعرض عليه الفحص بالمال الحرام. سبحان الله والله اعلم انا تتبعت كيف بتصير الامتحانات من الله عز وجل. هلأ ابن 14 سنة 15 سنة 16 سنة هادا امتحانه ببر الوالدين. امه بتقول له لأ هو بده يقول ايه. امتحانه ان يؤثر محاب الله على محابي. بصير عمره 17 .18. 19عشرين. بصير فحص تبعه النظر الى الحرم. نفسه تتشوف وبتطلع الى متابعة الحرم. بصير عمره خمسة وعشرين سنة وعشرين سبعة وعشرين. بصير فحص تبعه بالمال للحرم. اخي بدنا نشتغل. صحت لي شغل. مهندس معماري. جاء الي ليقول يا استاذ انا معروض علي. يعني يعرض علي اعمال. من جملتن فنادق. والفنادق خمس نجوم. بقلبا منا في بارات. مسموح انا للباب؟ الجواب لأ. هلأ انا واياكم بنقول لا يعني عادي. بس هو هداك اللي عم بيدور على شغل واجا هاد الشغل. يا اخي صعب. صعب يقول لأ. شلون بده يقول لأ يا اخي وبده ياكل وبده يشرب. واصلا هو مسافر برات البلد وهاد الشغل دوبه اجاه شغل وصار له ما بعرف قديش بدون شغل. ويتصل فيني اخ تاني او يراسلني اخ تاني. انه اخي انا ما صح لي شغل غير بمطعم. والمطعم بيقدم لحم خنزير وبيقدم مسكرات. معلش انا بس والله ما بشرب. والله ما باكل. هيك متى ما صار عمرك خمسة وعشرين ستة وعشرين سبعة وعشرين بصير الفحص بالمال الحرام. و هكذا انت كلما ترقيت يشتد الامتحان عليك. بس عندما تؤثر محاب الله على محابك الله يورثك محبة في قلبك. خمسة مطالعة القلب لاسمائه وصفاته. ومشاهدتها ومعرفتها. وتقلبه في رياض هذه المعرفة ومبادئها. يعني انت طالع هيك في قلبك معنى اسم لطيف. يا اخوان جل الله عز وجل اللطيف. كل سنة بينزل الى الارض ملايين الاطنان من الامطار. ماء. لو الله نزلن كتلة واحدة هيك على راس العباد. لهلكوا. ازا انت بتحصي والدك من وقت ما صار عمره 14 سنة لوقت ما صار عمره خمسة وسبعين سنة. قديش اجاه رزق. بيطلعوا ملايين الملايين. طيب. لو الله بعت لن اياهن لابوك هدونة. لما صار عمره 14 سنة الله بعت له شي مية مليون. وبعدين خلص قطع كل شي عنه. بس لا اللطيف هو الذي يرسل لك رزقك شيئا فشيئا. لانه بيعرفك بتبعزق وبتروحهن وما بتعرف مصلحتك. بيقوم بينزل لك اياهن شوي شوي. لو الله عز وجل جعل الحمل اليوم المرأة بتحمل بكرة بدا تلات. شيء عجيب. لكن اللطيف تلطف بعباده. يا اخوان من طالع اسم الله تعالى اللطيف ذاب خجلا من حضرة الله عز وجل. كم من مرة تلطف الله بك من اذى ان يصيبك فارتفع. كم من مرة تلطف الله باولادك. تلطف الله بزوجتك. لأ واللطيف مثلا لما بده ينزل المطر اول شي بيغيم لك السما شوي شوي. بعدين بينزل لك بخات خفيفة. مشان اذا واحدة ناشر غسيل تضبهن. لانه لطيف بلا ما يتجأجأوا الغسيلات. بس هي اذا ما بدور على مصلحتا يتشتشو الغسيلات. و يلي ماشي فارد بسطة كمان بيضبا هيك على جنب. لان الله عز وجل لطيف. اذا تفكرت باسم الكريم. اذا تفكرت باسم الخالق البارئ المصور. والله عجيب هزا الجسم الزي بين يديك. انا اقول يا اخوان الله خالق لكم الجسم تبعكن مع الصيانة تبعه. بالله عليك قل لي انه ماكينة بتشتغل سبعين سنة؟ وما بتحتاج انه لا نفك شي من قلبا ولا نزيت. شو هالجسم سبعين سنة يا رجل عينك عم تشتغل. اذنك عم تشتغل. اسنانك عم يشتغلوا. قلبك يعمل. رئتينك تعمل. عظامك تعمل. شو شو هالماكينة سبعين سنة؟ لو حديد كان كان فرط. لكن اللطيف. لكن الخالق البارئ المصور. فمطالعة القلب لاسماء الله تعالى وصفاته تزيد محبة الله عز وجل في قلبك. ستة. مشاهدة بره واحسانه ونعمه الظاهرة والباطنة. داعية الى محبته. شوف النعم اللي الله مغرقك فيها. بينما حرم غيرك من كثير. والله يا اخوان اذن صرتو كلكم. بتستشعروا نعمة لما انت الصبح بتفتح حنفية المي بينزل مي. يا لطيف هاي شغلة كتير كبيرة. بتتزكروه قبل كم شهر لما تحملوا اناني وتمشوا بالطريق. بتتذكروا تنزلوا الوظيفة وعالمحل كل واحد بايده بدون. وكل واحد بسيارته كم بدون. تذكروا تتصلوا بالسيارة مشان الله تعوا عبوا لنا هون. وهون سمحولن يفوتوا وهون ما سمحوا لن يفوتوا. وهون نزيل لمدري مين تحاكيهم. هلأ انت اذا بتفتح حنفية هيك في مي. هاي المي. قل ارأيتم ان اصبح ماؤكم غورا. فمن يأتيكم بماء معين. الله رب العالمين. هذه الماء نعمة. الولد نعمة. عندك اولاد والله هذه نعمة. الزوجة نعمة. صلاح الزوجة والاولاد نعمة. انك الحمد لله انت بتفوت عالجامع نعمة. اي نعم. مشاهدة بره واحسانه. السابع وهو اعجبها. انكسار القلب بكليته بين يدي الله تعالى. هذا اللي بدأنا فيه في اثناء الحديث. يا اخوان نصيحة لوجه الله. ابقوا قلوبكم منكسرة بين يدي ربكم. في حل وترحالكم قيامكم وقعودكم طعامكم وشرابكم. اقسم بالله زيتونة انت ما بتقدر تجيبها عالسفرة عندك بالبيت. لكن خالق السماوات والارض جيب لك اياها. اقسم بالله زيتونة ما بتقدر تمضغها وتبلعها. ولو اراد ان يقتلك بها لقتلت. خلي قلبك منكسر بين يدي الله. اذا صليت خلي قلبك منكسر بين يدي الله. اذا نمت وانت على سريرك خلي قلبك منكسر بين يدي الله. اذا مشيت بالطريق. اذا بالشركة عطوك شهادة تقدير. اذا بالبكالوريا طلعت الاولي. اذا بالجامعة صفقوا لك كلن. خليهن يصفقوا. بس انت بينك وبين حالك خلي قلبك منطرح على باب ربك. قل له يا رب انت الفعال. انت الذي اكرمتني. هذا يورث المحبة في القلب. من اسباب الجالبة للمحبة. الخلوة به وقت النزول الالهي. لمناجاته وتلاوة كلامه. والوقوف بالقلب والتأدب بادب العبودية بين يديه. ثم ختم ذلك بالاستغفار والتوبة. قيمة وقت التنزل الالهي. الثلث الاخير من الليل. وقت السحر. يا شباب نصيحة يا رجال نصيحة. انتم برمضان الله اكرمكم. كلكم تفيقوا عسحور. وكثير منكم تهجد. خلوها عادي. اخلو بربك وقت التنزل الالهي. التاسع من الاسباب الجالبة للمحبة. مجالسة المحبين الصادقين. لانه هدول المحبين بيعدوك. والعاشر الاخير مباعدة كل سبب يحول بين القلب وبين الله عز وجل. اذا الك رفيق بيبعدك عن رب العالمين اتركه. اذا في عمل عم يبعدك عن رب العالمين اتركه. اذا في مكان يبعدك عن رب العالمين اهجره. حتى تصفو لك الاسباب الجالبة للمحبة. هناك يكرمك الله تعالى بان يباهي بك في القرآن الكريم بقوله والذين امنوا اشد حبا لله. نسأل الله عز وجل ان يملأ قلوبنا محبة لحضرته. نسأل الله عز وجل ان يجعلنا من الذين احبهم واحبوه. نسأل الله عز وجل ان يكرمنا بالاعمال التي تجلب محبة الله تعالى الى قلوبنا. اللهم ارزقنا وحب من يحبك. وحب عمل صالح يقربنا الى حبك. واجعلنا من الذين تباهي بهم خلقك. والذين امنوا اشد حبا لله. وصلى الله على سيدنا محمد. وعلى اله وصحبه وسلم. والحمد لله رب العالمين.