ازاي تعود عقلك على التفكير الابداعي ٦ طرق مثبتة علميًا افيدونا من كتاب قبعات التفكير الست

هل انت من الناس اللي بيعتمدوا على الاسس العلمية في اتخاذ القرارات ولا بتفضل انك تعتمد على الفراسة ولا احساسك الداخلي طيب هل في اوقات بتكون عايز تفكر بشكل منطقي وعقلاني جدا، لكن بتلاقي مشاعرك مسيطرة عليك مش عارف تتخلص منها زميلك في الشغل مثلا عمل معك موقف وحش بقصد او بدون قصد ولا زلت مطالب انك تتعامل معه بشكل كويس مهنيا ولسه مش عارف. طب خلينا نفترض انك بتشتغل في مجال الحسابات وجالك عرض انك تغير شغلك خالص وتشتغل في مجال التسويق. المجال اللي بتحبه ولكن بمرتب ودرجة وظيفية اقل هل هتوافق على العرض ده طب هتفكر في الموضوع ازاي هل هتوافق لانك بتحب مجال التسويق ولا هتفضل في مكانك في الحسابات لانك وراك مسئوليات والتزامات ومش هتعرف تواجهها لو قبلت بالمرتب الاقل ازاي تاخد القرار؟ وتفتكر تخلي العاطفة هي اللي تسيطر ولا المنطق وما حدش يقول العقل. لاننا زي ما هنعرف دلوقتي بعض القرارات في حياتنا ممكن العاطفة تكون جزء كبير منها، لانها بالنهاية جزء منك. تفكير الانسان هو عبارة عن مزيج من المشاعر والمنطق. الابداع والمعلومات وحاجات تانية كتير. من المشكلات الرئيسية اللي بتواجه اي شخص انه ما يبقاش عارف يستخدم تفكيره بالطريقة اللي هو عايزها في الوقت اللي هو محتاجه. ومن هنا بتيجي اهمية اننا نعرف ايه مكونات التفكير الاساسية وازاي نستخدم كل جزء في وقت الحاجة. وانسب كتاب بيتكلم في الموضوع ده هو كتاب قبعات التفكير الستة. لادوارد ديبونو وهو طبيب وعالم نفس متخصص في موضوعات التفكير الابداعي. وهو بالمناسبة مؤسس المصطلح ده. له اكتر من خمسة وسبعين كتاب مترجمة لاكتر من سبعة وتلاتين لغة. كتاب قبعات الست هيساعدك انك تستخدم نوع واحد بس من القبعات اثناء عملية التفكير علشان تقدر تتحكم في تفكيرك وتسيطر على افكارك بدل ما هي اللي تسيطر عليك وبالتالي تستخدم النوع المناسب لكل حالة او موقف في الوقت المناسب واستخدام كلمة قبعة بيعني دور معين بيلعبه الشخص زي مثلا لما اقول انه ده لابس قبعة الحكيم او الاب او الطبيب النفسي وهكذا اعتمد الكاتب على الترميز اللوني في القبعات انه يدي كل قبعة لون معين علشان هو اسهل في من اي حاجة تانية ونقدر فعلا نتخيل الشخص وهو بيعمل الدور ده وهو لابس القبعة دي باللون ده. طيب ايه هي قبعات التفكير الستة وايه دلالة كل لون وامتى بنستخدمها القبعة الاولى وهي القبعة البيضاء، هي انك بتلعب دور الكمبيوتر، بمعنى انك بس تدينا الحقايق والمعلومات عن موضوع معين بدون اي شرح او تفسير او رأي شخصي. في اوقات معينة اثناء نقاش في موضوع معين بنحتاج بس المعلومات المتعلقة به من غير شرح او تفاصيل او حتى ابداء وجهة او رأي. لكن المعلومات حوالين موضوع زي مثلا البطالة بتكون كتير. هناخد ايه وهنتكلم عن اي معلومات بالظبط. وهنا تيجي اهمية التحديد. ان هو نبقى عارفين ومحددين عايزين انهي معلومات بالظبط. احصائيات مثلا عن نسبة البطالة في اخر عشر سنين ولا نسبة البطالة في الاناث مقابل الذكور وهكذا. وعلشان نستخدم القبعة البيضة بشكل صحيح من المهم اننا نحط اسئلة محددة علشان نقدر نوصل للمعلومات المطلوبة. النوع ده من التفكير مهم جدا للمحامين والقضاة اللي بيحققوا في قضايا وملفات شائكة وحساسة. وخلينا نقول ان الناس دايما بيكون عندهم خلط ما بين الحقائق واللي بيعتقدوا ان هي حقائق. علشان كده الكاتب قسم الحقائق لنوعين حقائق تم فحصها وحقائق اعتقادية. الحقائق اللي تم فحصها هي حقائق مثبتة بمعنى انه تم اثبات صحتها وبتسمى حقائق من الدرجة الاولى. والحقائق الاعتقادية هي حقائق من الدرجة الثانية يعني رأي بيتعامل معه صاحبه على انه حقيقة. لكنه في الاخر وجهة نظر ما تمش فحصها او التأكد منها كحقيقة وفي حالة استخدام القبعة البيضاء غير مسموح تماما بالاعتماد على الاراء ولكن الحقائق فقط وبالتحديد اللي تم فحصها والتأكد من صحتها. القبعة دي مصممة خصيصا بهدف جمع معلومات محايدة واحصائيات وتقارير مع استبعاد ما يسمى بالحدس او الاحاسيس الداخلية او الانطباعات. وبيحاول النوع ده من القبعات انه يعلمنا الدقة والتظيم علشان نوصل للحيادية والموضوعية في تقديم المعلومات. القبعة التانية واللي اعتقد ان هي هتناسب كتير من النساء لان شعارها ببساطة عندي احساس. او انا حاسة بكذا وهي القبعة الحمراء. القبعة الحمراء بتدي شرعية للعواطف والاحاسيس والنواحي اللا عقلانية كجزء رئيسي في التفكير. بتساعد الشخص انه يعرف احاسيس الاخرين ناحية موضوع معين. مش مهم ايه سبب الشعور ده، المهم انهم يعبروا بحرية عن احساسهم ومشاعرهم تجاه الشيء ده بدون التقيد بابداء اسباب. ميزة القبعة دي ان هي بتسمح للعواطف والاحاسيس ان هي تخرج. لانه لو ما عبرناش عنها بتفضل حبيسة في العقل الباطن بدون شك على تفكيرنا بطريقة سلبية بدون ما نحس. لان العواطف اللي بنحس بها بتحدد ادراكنا للاشياء والاشخاص من حوالينا. وبالتالي الهدف منها اظهار العواطف الكامنة في خلفية نفوسنا علشان نقدر نشوف تأثيرها على اختياراتنا وقراراتنا. وبالتالي نمنعها من السيطرة على عملية التفكير كلها. بتغطي القبعة الحمراء نوعين اساسيين من الاحاسيس. الاحاسيس الخاصة بالعواطف العادية اللي احنا كلنا عارفينها زي الحب الكره الغضب الاعجاب الغيرة وغيرها. والاحاسيس التانية الخاص بالحكم المعقد المركب على الامور واللي بيحصل بصورة فورية وما نقدرش ابدا نعرف ايه سببه بمعنى اخر الحدس او الفراسة او الظن وده بيحصل نتيجة خبرة تراكمية للشخص ده في مجال معين او عن شخص اخر. زي مثلا احساس موظف مبيعات انه المنتج ده مش هيحقق مبيعات عالية بدون ما يكون في سبب واضح للشعور ده غير خبرته السابقة في السوق. الحدس ده دايما بنلاقيه عند العلماء ورجال الاعمال الناجحين القادة العسكريين اللي بيحكموا على الامور بناء على خبرتهم الطويلة. ميزة القبعة الحمراء انه اي شخص ممكن يلبسها في اي نقاش علشان يعبر عن مشاعره بطريقة امنة وشرعية بدون خوف من انتقادات الاخرين. بدل ما تسيب تأثير سلبي على تفكيره كله وبالتالي ممكن توصله في لحظة معينة للانفجار. وبالتالي نقدر نكتشف المشاعر السلبية ونتعامل معها بشكل مبكر. تالت قبعة هي القبعة السوداء. واللي بالمناسبة ما لهاش اي علاقة بالتيشيرت اللي انا لابسه النهاردة �. بتركز القبعة السوداء على الجوانب السلبية في اي محل نقاش بس من خلال تقديم مبررات واسباب واضحة. مش زي القبعة الحمراء اللي ما لهاش اي اسباب محددة. القبعة السوداء هنا بتشوف الجانب المظلم او الاسود للاشياء. ولكنه دائما منطقي ومبرر. بتجاوب مثلا على سؤال ليه ممكن منتج معين يفشل. فبتركز زي ما قلنا على السلبيات بس. وده لانه في ميل قوي في العقل للتركيز على السلبيات. وبطبيعة الحال دائما الهدم اسهل من البنى. والبحث عن السلبيات له جاذبية. لو ما انتبهش لها ممكن ينغمس فيها ولانه اي شخص بيكون مبسوط لما بيثبت خطأ الطرف الاخر. ولما شخص بيهجم على فكرة معينة بيجي له احساس فوري بالافضلية بمعنى انه افضل من الشخص اللي قدم الفكرة. وطبعا زي ما احنا عارفين ما فيش اسهل من النقد. والافضل دايما اننا بنستخدم القبعة الصفراء قبل السوداء واللي هنتكلم عليها كمان شوية بالذات لو كنا هنناقش افكار جديدة. علشان نقدر نشوف ايجابياتها قبل سلبياتها لانه السلبيات قادرة لوحدها ان هي تموت الفكرة او المشروع الجديد قبل ما يبدأ. القبعة الرابعة هي القبعة الصفراء. طبعا زي ما قلنا قبل كده هي نقيض القبعة السوداء. سمى الكاتب القبعة الصفراء باسم التطلع الايجابي. لاننا لما بنيجي بنعمل خطة او بننوي تنفيذ فعل معين فاحنا بنبص للمستقبل. ولو كنا متأكدين من الماضي واللحظة الحالية فمحدش ابدا يقدر يكون متأكد بنسبة مائة بالمائة من المستقبل. وعلى الرغم من انه تفكير القبعة الصفراء هو تفكير في الايجابيات الا انه زي القبعة البيضاء والسوداء لازم تكون الايجابيات دي مبررة اسبابها مش بس ايجابيات وخلاص. وبالتالي لازم للي هيستخدم القبعة الصفراء انه يقول اسباب ومبررات التفاؤل ده. والا تحول الموضوع لمجموعة من المشاعر الغير مبررة زي القبعة الحمراء. فاحنا محتاجين حكم ايجابي على الامور ولكن باسباب كافية ومقنعة بتدعم الحكم ده. وعلشان نبسط الموضوع نقدر نقول ان القبعة الصفراء بتقوم بدور التفكير البناء. المهتم بتقديم افكار واقتراحات جديدة في حين ان القبعة السوداء بتقوم بدور التفكير النقدي او نقد الافكار واننا نشوف سلبياتها. وطبعا التفكير البناء تفكير ايجابي فالمقترحات بتصنع علشان نخلي الاشياء افضل او لحل المشكلات او لانتهاز الفرص وبالتالي فالشخص اللي بيقترح دايما عايز يعمل تغييرات ايجابية. طب هتعمل ايه لو واجهتك مشكلة معينة وجربت كل الحلول الممكنة المتاحة. ولقيت ولا حل فيهم نافع. انت هنا محتاج القبعة الخضراء. اللون الاخضر هو لون الخصوبة والنمو. لون البيئة اللي بتلجأ لها للاسترخاء وتصفية الذهن. وبالتالي هو افضل لون يعبر عن الابداع. بتهتم القبعة الخضراء بالافكار والرؤى الجديدة. والتحرر او الهروب من الافكار والحلول القديمة التقليدية. بهدف اننا نلاقي افضل منها. الابداع ببساطة هو فكر التجربة. ما تقدرش تتنبأ بنتيجة التجربة. لكن المهم ان التجربة تتم لغاية نهايتها. استخدام القبعة الخضراء في حد ذاتها مش هيخلي الناس اكثر ابداعا. ولكن هيخليهم مهتمين اكتر بانهم يحطوا وقت ومجهود وتركيز للانفتاح على افكار جديدة وغير تقليدية. فهنا اهم شيء اننا نخصص وقت اكثر وبيئة خصبة لتوليد الافكار الجديدة حتى لو ما جتش. المهم اننا نبذل جهد من غير انتقاد ولا تسفيه. والافكار حتيجي ان شاء الله تباعا. وهنا يجي السؤال المهم. هل الابداع موهبة ولا مهارة ممكن اي حد يتعلمها. الناس بتميل لفكرة ان الابداع موهبة. او ملكة ذاتية بيختص بها بعض الناس عن غيرهم. فبيعتقدوا انه من الافضل انهم يسيبوا الابداع لناسه وما يبذلوش مجهود في اكتسابه. لكن الكاتب بيأكد انه مهارة يمكن ان احنا ننميها ونتعلمها لكن بطبيعة الحال في ناس مع المهارة بيكون عندهم الموهبة وبالتالي بيكونوا اقوى في التفكير الابداعي. القبعة السادسة والاخيرة هي القبعة الزرقاء. اللون الازرق بيرمز لسيطرة الرؤية العامة. واقتبس الكاتب اللون من لون السما اللي بيغطي كل حاجة حوالينا. والازرق لون بيوحي بالسيطرة والتحكم الهادئ في مجريات الامور. القبعة الزرقاء عاملة زي المايسترو بالنسبة للاوركسترا. بينظم العزف بين الالات المختلفة. وهنا دورها انها استخدام قبعات التفكير المختلف. ولما حد بيلبس القبعة الزرقاء بيكون دوره ان هو يحدد للمجموعة اي نوع من القبعات هيستخدموها دلوقتي. فالقبعة دي وكانها مبرمج للتفكير الانساني. من خلال القبعة دي نقدر نحط خطة لتفكيرنا وتفاصيل عن الحاجات اللي المفروض نعملها في ترتيب محدد. صاحب القبعة الزرقاء يقدر يقول مثلا دلوقتي كل الناس تضع القبعة البيضاء وتطلع كل الاحصائيات الخاصة بالموضوع الفلاني. او يا ريت نوقف استخدام القبعة الصفراء ونبدأ كلنا القبعة الحمراء وهكذا. دور القبعة الزرقاء مش بس تنظيم انواع التفكير المختلفة ولكن لها دور في تنظيم جوانب اخرى من التفكير زي ترتيب الاولويات حصر التحديات وغيرها. واهم دور بتلعبه ان هي بتساعدنا نركز على فعل معين او شيء معين خلاله علشان نقدر نحقق المطلوب او الهدف. مفكر القبعة الزرقاء عارف المناطق اللي المفروض التفكير يتوجه لها في الاوقات المختلفة. وكمان المشكلات والبؤر اللي المفروض نركز عليها. كمان هو مسئول عن اللي دار في الجلسات وتلخيص النتايج اللي تم انجازها من وقت لآخر. وطبعا ممكن اي شخص انه يستخدم القبعة دي مش بس هتكون مقصورة على المدير او رئيس الجلسة. دلوقتي احنا فهمنا انواع التفكير الستة المختلفة. وطرق واوقات استخدامها. تقدر انت كمان تستخدمها في حياتك العملية. الدراسية او حتى الاجتماعية علشان توصل للنتائج اللي انت عايزها. واساس فكرة قبعات التفكير الستة هو تشجيع الناس على لعب ادوار مختلفة بانماط تفكير مختلفة من غير ما يخافوا انهم يفقدوا ملامحهم او طباعهم الذاتية زي الممثل مثلا اللي بيعمل شخصيات مختلفة لكن شخصيته الحقيقية بتفضل ثابتة ما بتتغيرش فامتلاك القبعات الستة والقدرة على استخدامها نوع من المهارات اللي احنا محتاجين نتعلمها في حياتنا العملية وكمان الشخصية اشوفكم على خير ان شاء الله الفيديو الجاي سلام عليكم.