الأكل المضر للكلى الأكلات الممنوعة لمرضى الكلي

السلام عليكم ورحمة الله وبركاته. يعتبر الصوديوم والبوتاسيوم والفسفور والبروتين من اكتر العناصر الغذائية المضرة بالكلى. لكن ايه هي الكميات المسموح بها وايه هي الاكلات اللي بتحتوي على العناصر دي? ده اللي هنتعرف عليه في فيديو النهاردة. تابعني بعد الفاصل انا محمود جمال وانت بتشوف برنامج وقاية. اهلا بكم مرة تانية. ونبدأ حلقتنا باول نوع من المصادر الغذائية المضرة بالكلى وهو الصوديوم. ويعتبر ملح الطعام هو المصدر الرئيسي للصوديوم في نظامنا الغذائي. لكن المشكلة الاكبر بتكون من المصادر المخفية للصوديوم. ومن اهم المصادر دي كل انواع الاكلات المعلبة زي اللحوم المعلبة وكمان الخضروات والفواكه المعلبة. وكمان كل انواع الجبن عالية الصوديوم زي الجبن الرومي والشيدر وكمان المخللات والاكلات الجاهزة بتحتوي على نسب عالية من الملح. والكمية المسموح بيها على مدار اليوم من الملح هي ٢ جرام. في حالة زيادة استهلاك الملح عن الكميات المسموح بيها بيزيد خطر ارتفاع ضغط الدم واحتباس الجسم. وبننصح دايما باستبدال الملح بالخل والليمون وانواع التوابل زي الكمون. النوع التاني من المصادر الغذائية المضرة بالكلى هو الفسفور. ويعتبر الفسفور من المعادن المهمة بالتوازن مع الكالسيوم للحفاظ على صحة العظام. والكمية المسموح باستهلاكها على مدار اليوم هي من تمانية من عشرة لواحد جرام. لكن في حالة مرضى القصور الكلوي بتزيد نسب الفسفور في الدم. وبيزيد معها فرص الاصابة بهشاشة العظام والكسور المتكررة والحكة الجلدية. علشان كده دايما بننصح بتقليل استهلاك الفسفور لمرضى القصور الكلوي. ومن اهم مصادر هي البروتينات. سواء كانت البروتينات الحيوانية او البروتينات النباتية. لكن الاخطر هو الفسفور المضاف واللي بيتم اضافته على المشروبات الغازية ومشروبات الطاقة وكمان اللحوم المصنعة. وده لانه بيدي طعم مميز لهم. النوع التالت من العناصر الغزائية المضرة بالكلى هو البوتاسيوم. يعتبر البوتاسيوم من المعادن المهمة جدا واللي لها دور رئيسي في انقباض العضلات بما فيهم عضلة القلب. وكمان لها دور رئيسي في ارسال الاشارات العصبية. لكن في حالة مرضى القصور الكلوي بتزيد نسب البوتاسيوم في الدم. وده بيسبب مشاكل للمريض من اهمها ضعف العضلات. وعدم انتظام ضربات وده ممكن يسبب كمان توقف مفاجئ في عضلة القلب. والنسب المسموح بها من البوتاسيوم على مدار اليوم هي اتنين جرام. من اهم مصادر البوتاسيوم هي الخضروات زي السبانخ والشمندر والفواكه زي الموز والكيوي. علشان كده دايما بننصح بتقطيع الفواكه والخضروات الى مكعبات ونقعها في مية لان ده بيقلل من نسب البوتاسيوم فيها بشكل كبير. اما النوع الرابع من العناصر الغذائية المضرة بالكلى وهو البروتين. يعتبر البروتين من العناصر المهمة لبناء العضلات وتقوية الجهاز المناعي. لكن في حالة مرض الكلوي استهلاك البروتين بكميات عالية بيسبب زيادة نسبة اليوريا في الدم. وده بيسبب مشاكل من اهمها فقدان الشهية والقيئ والغثيان المستمر.