الذئب الدحيح

أنا والله ما بقيت عارفة أنا إيه اللي مصبّرني عليك كل دا يا "دياب"! ممكن أعرف حبيبتي متعصّبة وبتزوم عليا ليه؟! أنا كنت المفروض أسمع كلام أبويا، أشوف العريس اللي جايبهولي، Alpha وجاهز من مجاميعه. أنا شامم ريحة خَلَعان! هو أبوكي دا ديله مش هيتعدل أبدًا؟! "دياب"! اتكلم على بابا عِدِل! ما قُلتلك يا بت، اصبري عليا يومين، أنشق عن القطيع، وساعتها، آخدك في حتة بعيد، ما حدش يعرفلنا طريق. أنا شامّة ريحة الأسطوانة المشروخة اللي بأسمعها كل يوم! لأ، دي حجّة لذيذة والله، كان نفسي تلحقيها، بس انتي جيتي متأخر! خلّيك، افضل استخف في دمك كدا، هتفضل طول عمرك سلبي وديلك بين رجليك! لا! لو قلّيني أدبك، هأمشي وأسيبك! أنا فيا اللي مكفّيني أصلًا! لأ... استنى يا "دياب"... أنا مش بحلم بحاجة غير إن الجراوي بتوعي يشيلوا اسمك. خلاص يا بت، ما تعويش! يعني، هو أنا أكره؟! ما أنا نفسي تبقي أم للجراوي بتوعي، ونربّيهم مع بعض تربية نضيفة، مش زي تربيتك! ياه يا "دياب"! وندخّلهم "نادي الصيد"، زي ما طول عمرنا بنحلم! ونغنّيلهم أغنية حبنا كل يوم! "عو! عو! عو! - عو! عو! عو! - عو! عو! عو! - عو! عو! عو! - عو! عو! عو!" أمّال مستني إيه يا "دياب"؟! أنا خلاص، بقى عندي 6 سنين! وأبويا مش هيستنى عليا أكتر من كدا، ما انت عارف، موضوع الانقراض دا واكل دماغه! طب بصي، عشان أبقى صريح، ومن غير لف ودوران، انتي عارفاني، طبعي وفي، أنا بصراحة، مش قادر أفارق أمي اليومين دُول، الست كبيرة وعندها سُعار، أسيبها لمين؟! والله؟! جاي تقول الكلام دا يا حبيبي، بعد ما لطعتني جنبك طول الوقت دا؟! بقولّك إيه يا "دياب"...! نور عيون "دياب"! أنا ماشية! شوفلك كلبة! شامم ريحة وِحدة! أعزائي المشاهدين، السلام عليكم ورحمة الله وبركاته، أهلًا بكم في حلقة جديدة، من برنامج "الدحّيح"! في القرن الـ19، نشر الكاتب الإنجليزي "روديارد كيبلينج" روايته The Jungle Book، اللي بطلها "ماوكلي"، الطفل الصغير اللي انفصل عن عيلته، واتربى في غابات "الهند" وسط الذئاب. قبل صدور الرواية، سنة 1872، مجموعة من الصيادين خرجوا لرحلة صيد في غابات "الهند" الشمالية، فلمحوا قطيع من الذئاب، معاهم كائن غريب، القطيع لمح الصيادين، فاختفوا في وكر قريب، الصيادين قربوا من الكهف، وولعوا نار عند المدخل، فاتملا الكهف بالدخان والحرارة، فالديابة اللي جوا هربت. الروايات بتختلف، فيه اللي بيقولوا إن الصيادين قتلوهم، وفيه اللي بيقول إن الصيادين أسروهم، ولكنهم اتفاجئوا إن أحد أفراد هذا القطيع مش ذئب. "أمّال إيه يا (أبو حميد)؟ كلب وبيحوّر؟!" معاهم ولد بشري، ماشي على أطرافه الأربعة، ما بيتكلمش، ولكنه بيعوي وبيزمجر. قاموا واخدين هذا الولد لملجأ، وهناك ادّوله اسم "سانيشار"، وهي كلمة أوردية معناها "يوم السبت". هنا، ممكن تفكر إن "ماوكلي" قصة مبنية على "سانيشار"، ودا ممكن يكون صح، لأن "كيبلينج" كان عايش في مستعمرات "بريطانيا" في "الهند"، وجايز يكون سمع عنه. وجايز يكون غلط، لأن لمّا قصة "سانيشار" انتشرت عالم الجيولوجيا الأيرلندي "فالنتاين بول"، بعت رسالة للقس المسئول عن الملجأ، يقولّه، "بقولّك إيه، ما تحكيلي أكتر عن قصة الطفل اللي اتربى وسط الذئاب." فرد عليه الراجل برد غريب جدًا، "تقصد أنهي واحد فيهم؟ أنا عندي أكتر من ولد بالوصف دا. لو تقصد الولد اللي خرّجوه من الوكر بالدخان، فالولد كوّن رابط مع إنسان واحد، وهو طفل تاني اتلقى برضه في الغابة." في نفس الفترة، اتبلغ عن 4 أطفال مع الذئاب، Wolf Children. وعلى مر السنين، بدأ يظهر غيرهم، زي الحالة التاريخية للتوأم "أمالا" و"كامالا"، يا أختي! انتي ذئبة اعوي، القافلة سيري! التوأم اللي اتربوا مع ذئبة وأشبالها، كانوا بيخرجوا معاها، يشربوا من النهر بنفس طريقتها. العيال دي لمّا اتاخدت الملجأ، كانوا بيفضّلوا يصاحبوا الكلاب عن زمايلهم، وكانوا بيتصرفوا كأنهم حيوانات برّية! "سانيشار" مثلًا، كان بيشرب زي الكلاب، ما بيستحملش ملمس الهدوم، بيشم أي حاجة قبل ما ياكلها، بيعشق اللحمة النية وبيسنّ سنانه على العضم، مفتقد لسمات بشرية زي الضحك والابتسامة. طبعًا الحالات دي جننت العلماء، أثارت أسئلتهم عن دمغتنا والسمات البشرية، وتطور اللغة بقى، وكل الحاجات دي. بصراحة، يا عزيزي، أنا كنت بأحكي هذه القصة، عشان أشد رجلك، "انت نجحت يا (أبو حميد)، مبروك! ها، عايز تقول إيه؟!" أنا بصراحة، يا عزيزي، عايز أتكلم بقى عن الذئاب. الكائنات المفترسة اللي لمّا شافوا طفل، بدل ما يشوفوه فريسة، قدّموله الرعاية والـCompany. "عادي يا (أبو حميد)، ما كلنا كائنات رحيمة. انت بس اللي علشان عايش في المدينة!" عزيزي، انت لو قابلت كتكوت في الشارع، هتفضل تأكّله وتربيه، لحد ما يكبر ويبقى فرخة، وتاكله! إنما بقى، الذئاب اللي سُمعتها سابقاها، في عدائها مع البشر والماشية، والدليل موجود على ملابس ذات الرداء الأحمر، مش ناسيين، على فكرة! ولكن خلّيني أقولّك إن تخيلات كتير عن الحيوانات، في الغالب، ما بتكونش شبه الحقيقة، "وجالوا علينا ديابة، واحنا يا ناس غلابة!" الحقيقة، يا عزيزي، إن الذئاب بتتبنى أطفال مش أطفالها، وأحيانًا، مش من نفس الفصيلة كلها، وسلوك زي دا نادر في الثدييات. معلش يعني، ليه أتبنى فرد من فصيلة تانية؟! دي حاجة ما لهاش أي معنى! بيهدّروا وقت ومجهود وطاقة على حد غريب، هو أنا لاقي أأكل نفسي وأأكل عيالي الأول؟ ويا سلام بقى لو كانت أم، فحليبها اللي المفروض محفوظ لنسلها، هيروح لحد غريب، ويا ريت بعد كدا هيشيل اسمها ولّا حتى جيناتها، ولّا هيكون ليه دور في أي قطيع يروحه، دا من جاي أبّين مختلفين بجينات مختلفة خالص! ولكن الفريد في الذئاب هو تقديرها للعيلة، ودا مش كلام رومانسي! ما فيش مكان في العالم لذئب منفرد، حياة القطيع شيء حتمي لنجاة الذئاب، الذئاب بتساعد بعضها في التربية، بيربوا صغار الذئاب التانية، بدل ما يتسابوا يموتوا. بيضموهم للقطيع عشان يزودوا التنوع الجيني اللي جوا القطيع، والاحتواء دا، زي ما شُفنا، بيمتد لأطفال من أنواع تانية. وخلّيني أقولّك إن الذئب مش هيتردد عشان يضحي بنفسه عشان القطيع، لو حسيتني، يا عزيزي، بأبالغ، بُص على الذئاب اللي عايشة معانا. "إيه؟! احنا وسطينا ديابة يا (أبو حميد)؟!" آه، يا عزيزي، انت أكيد شُفته النهاردة. هو، يا عزيزي، متوسط طوله كدا، وبيمشي على 4 رجلين وبيقول "هَو"! - "مش دا الكلب؟!" - أيوة، يا عزيزي، الكلب. الكلب، يا عزيزي، بيُعتبر نوع من أنواع الديابة، بُص على حلاوته وأخلاقه، وفاء وإخلاص لصاحبه، وبيدافع عنه بشكل مستميت، بشكل يصعب على منطق الطبيعة استيعابه. الخصال اللي موجود في الكلاب دي ما هي إلا امتداد لإخلاص الذئاب لرفاقها في القطيع. الذئاب بتتشارك تقريبًا في نفس الحمض النووي بتاع الكلاب الأليفة، اللي ما فيش شك إنها بتنحدر من الذئاب الرمادية، Canis Lupis، اللي حصل لبعضها تهجين من 14 لـ29 ألف سنة تقريبًا، وأنتجوا الكلاب بأنواعها، اللي اسمها العلمي الـCanis Lupus Familiaris، "الذئاب الأليفة"، فيه نوع تاني، يا عزيزي، من الذئاب ما حصلّهوش تهجين، وهو الذئب الحبشي، اللي بيسكن مرتفعات "إثيوبيا"، وتحسه شبه التعالب أكتر، ومش متبقي منه غير 500 فرد فقط. أما الـCanis Lupus، عددهم بيوصل لـ250 ألف، وفيه منهم 40 نوع فرعي، Subspecies، أنواع صغيرة في الحجم كدا، ساكنين عندنا في "الشرق الأوسط"، في الصحرا، زي الذئب العربي في "السعودية" و"سينا" و"فلسطين" و"الأردن" و"سوريا". أما بقى الأنواع الأكبر، فساكنة بقى في المناطق الشمالية من "آسيا"، و"أمريكا الشمالية"، ودُول أطوَل وأتقل من الذئب العربي. البشر الأوائل، اللي كانوا بيصطادوا أكلهم، أُعجبوا جدًا بالذئاب، وبدأوا يحاولوا يقلّدوهم. العلماء بيعتقدوا إن البشر اتعلموا الصيد أصلًا من الذئاب! وحسوا، زي ما تقول كدا، بالألفة معاهم، لأن حسوهم شبههم، بينجحوا بالتعاون، وبيعانوا بالوحدة، فمواهب الذئاب في الصيد أنتجتلنا كلاب صيد، وغريزتها في إنها تعرف منطقتها وتدافع عنها، أنتجتلنا كلاب حراسة. في النهاية، يا عزيزي، الذئاب ما هي إلا كلاب قررت إنها تكمّل حياتها في البرّية. لو جينا نذاكر هذا القطيع، هنلاقيه مكوّن من 6 لـ10 أفراد، وممكن يوصلوا في بعض الأحيان لـ20 ذئب، بينهم روابط اجتماعية قوية، ودي الحاجات اللي بتخلّي القطيع متماسك. أما لو ذئب منهم أُصيب، بيهتموا برعايته، وبيراعوا معاه العواجيز، ودا، يا عزيزي، لأن الذئاب الأكبر في السن، خبراء أكتر في الصيد، فبينقلوا معرفتهم من جيل لجيل، ولو فقدوا رفيق ليهم، بيبان عليهم المعاناة والحزن على اللي فقدوه. قطيع الذئاب بيحكم منطقة واسعة، مساحتها بتتراوح من 260 كيلومتر مربع لحد 2500 كيلومتر مربع. ما فيش ذئب غريب يقدر يتسلل لمنطقتهم، وإلا هيتحول لفريسة. ولكن ممكن برضه في ظروف معيّنة يقبلوه، زي ما قُلت، لو كان مثلًا ذئب صغير، "ممكن ناخد ونربيه، عشان التنوع الجيني." بس طبعًا المنطقة اللي هما عايشين فيها دي، أحيانًا بتتغير، لأن ما فيش أكل أو ما فيش ميّه، فالذئاب بتسافر. لو جيت بصيت على هيكل الذئب، هتلاقي إن دي كائنات مخلوقة للسفر والترحال، رجليها طويلة وصدرها عميق وأقدامها كبيرة، رجل الذئب نفس حجم إيد الإنسان تقريبًا، ممكن تمشي لحد 20 كيلو في اليوم الواحد، جايز سرعته مش مبهرة، لكنهم بيراهنوا على قدرتهم على التحمل. "طب معلش يا (أبو حميد)، ذئاب بالعدد دا بيتواصلوا مع بعض ازاي، خصوصًا في المساحات الكبيرة دي؟!" بيتواصلوا، يا عزيزي، من خلال تعبيرات الوش ووضعية الجسم والديل، "دي لغة الجسد يا (أبو حميد)؟!" آه. دا غير طبعًا علامات الريحة والصوت، وخصوصًا العواء. كل ذئب ليه عواءة مختلفة، زي بصمة الصوابع كدا، تنوع أصوات العواء بيساعد المجموعة إنها تفضل متواصلة، بيعووا عشان يجمّعوا القطيع، ويعرفوا أماكن بعض، ودا بيسمح ليهم إن هما يتفرقوا عند الصيد في خلال منطقتهم، ويعووا رايح جاي، عشان يحددوا مناطقهم من بعض. "عو!" دي، يا عزيزي، Live Location! الذئب الوحيد بيقدر يصطاد طائر أو سمكة أو سحلية أو غزالة، ممكن ياكل فاكهة، لكن المجموعة بقى، بالصلاة على النبي، تقدر تصطاد حيوان أكبر، زي قطيع من الغزلان والأيائل والموظ. "إيه يا (أبو حميد) الألفاظ دي؟! صعبة عليا!" شوف صورها، هتطلع في الـGraphics. عامل حساب كل حاجة، وكل ثغراتك عندي! لمّا الديابة دي بتخلّص على الفريسة، مش بياكلوا منها باعتدال، كل ذئب، يا عزيزي، ممكن ياكل 9 كيلوجرام في قعدة واحدة، ما عندهومش في آداب المائدة غير إن الذئب الـAlpha هو اللي ياكل الأول. "إيه يا (أبو حميد)؟! هما عندهم تمييزات طبقية؟! فيه Alpha، وفيه مش Alpha؟! ولمّا هما كدا، خلّتني أحبهم ليه؟!" يا أهوج! دي استراتيجية عشان الذئاب يتعاونوا، بأقصى قدر ممكن في الصيد والدفاع عن منطقتهم، لازم يبقى فيه حد يكبروله، عندهم بنية اجتماعية منظمة، تسلسل هرمي صارم. في قمة هذا التسلسل الـBreeding Pair، أو "زوج الذئاب المتكاثر"، الـAlpha Male والـAlpha Female، دُول الوحيدين، يا عزيزي، اللي ليهم حق إن هما يتجوزوا، Alpha يتجوز Alpha! بعدهم، بييجي ذئاب أقل في السُلطة، الباحثين بيسموهم الذئاب Beta، وجودهم مهم للقطيع، لأن هما، زي ما تقول كدا، بيبقوا Second in Command، الذئب الـBeta بيشارك في الصيد وكلمته بتمشي على كل القطيع، ما عدا الـAlpha، ولمّا الـAlpha بيتصاب أو بيموت، هو اللي بينوب عنه، ودا طبعًا لأن مواجهة الفرايس أحيانًا بتتسبب في كسور في العظام والجماجم، وأحيانًا، بتعمل جروح. فوارد يعني إن الـAlpha يتكِلّ على الله! هي الدنيا كدا دوّارة! والـBeta يكبر ويمسك مكانه ويبقى هو الـAlpha. والكلام دا عن الذكور والإناث، يعني ممكن أنثى Beta تبقى ست القطيع لو الـAlpha ماتت، ولكن في هذا المجتمع، الذكور بيهيمنوا على الذكور، والإناث بيهيمنوا على الإناث. بعد Beta، بتيجي فئة الذئاب الـOmega. عالمة الطبيعة الأمريكية "جايمي داتشر"، وزوجها "جيم داتشر"، اللي درسوا سلوك الذئاب لسنين، واتشاركوا في 7 كُتُب عن الذئاب، قسّموا الذئاب للـ3 فئات دُول، الـAlpha، الـBeta، الـOmega، حيث الـOmega أدنى رتبة، دُول، يا عزيزي، بيبقوا الملطشة بتاعت القطيع، ذئاب خاضعة، بيوطوا رؤوسهم لو عدّى Alpha، بيستنوا بواقي الأكل بعد ما المسيطرين ياكلوا اللحمة الحلوة، دُول العواطلية بتوع مجتمع الذئاب، ما لهومش حق يكوّنوا روابط بينهم، زي الـAlpha، لأن أساسًا ما لهومش حق يتجوزوا أو ياخدوا قرار من نفسهم. "طب يعني يا (أبو حميد)، معلش، التسلسل دا أبدي؟! ما بيتغيرش يعني؟! Software نزلّهم من أول يوم نزلوا فيه على الأرض؟!" لأ، يا عزيزي، النظام دا وارد جدًا يتغير. أحيانًا، ذئب من رتبة قليلة يزهق من وضعه، فيثور على الـAlpha، ودا بيحصل في معارك قليلة، ولكن لأن استقرار القطيع شيء حتمي للبقاء، فلازم الاتنين يتصالحوا. فيه دراسة اتعملت من 2008 لـ2009 على مجموعتين من الذئاب، الباحثين سجلوا سلوك الذئاب بعد المعارك، وقارنوها بسلوكهم في وقت ما فيهوش صراع، وجدوا، يا عزيزي، إن الذئاب التابعة بعد المعركة، هي اللي بتصالح المسيطرين، عن طريق إن هما يلمسوا مناخيرها أو يلحسوها. الباحثين بيعتقدوا إن لمس المناخير هي الطريقة اللي الصغير بيعتذر للكبير بيها، وكل ما زادت حدة القتال، كل ما زادت السلوكيات الودودة بعده، فكل، يا عزيزي، ما يضربوا بعض، كل ما يحبوا بعض أكتر، بعدها يعني. طبعًا الضعيف هو اللي بيحب في الكبير. ما زال برضه، يا عزيزي، هناك نوع من أنواع الرياء، ونوع من أنواع الطبقية اللي احنا بنحاول نجمّلها، زي ما احنا بنجمّل عالم الحيوان دايمًا. وأحيانًا، الذئب الخاضع بيقوم نايم على ضهره، وتاني ديله بين رجليه، دا، يا عزيزي، مش بس خاضع كدا، دا بيعرّض أكتر نقط ضعف فيه للعلن، معدته وحَلقه، بيكشفهم للذئب المسيطر عليه، كعلامة، "إن أنا بسلّم نفسي، مش معايا سلاح!" الإقرار دا بيحصل عشان يحافظوا على التسلسل الهرمي اللي بيحفظ النظام، مين ياخد القرارات، ومين لأ، مين ياكل الأول، ومين ياكل الأخير، مين هنتعاون معاه، ومين هنسحقه! ومع هذا النظام اللي ما بيخرّش الميّه، والبنية الاجتماعية المعقدة، يقوم مقرر ذئب ما إنه يغادر القطيع، وما يرجعش تاني، يسافر برة المنطقة لوحده، ودي ظاهرة معروفة بـ"الذئب الوحيد"، أو الـLone Wolf، الذئب دا بيفضل ماشي مئات الكيلومترات لحد ما يهاجر من منطقته، تخلّي هذا الذئب عن المجموعة بتاعته، معناه إنه تخلّى عن الحماية، اللي هذا القطيع بيدّيهاله. ممكن، يا عزيزي، يلاقي بشر، فيقتلوه، أو يلاقي ذئاب تانيين، فيقتلوه، أو يلاقي حيوانات مفترسة، فتفترسه، ممكن عشان يلاقي وجبة آمنة، يمشي مئات الأميال، أو يلف حوالين مناطق ذئاب تانية، وهو بيشمشم طول الوقت عشان ما يتعدّاش حدود منطقته، كمان، ما بيعويش، عشان العواء ممكن يجذب الأنظار ليه. عشان كدا الأجانب عندهم المصطلح المشهور بتاع الـLone Wolf، بيقولوه عن الإنسان المستقل اللي بيفضّل العُزلة، وبيشُق طريقه بنفسه، مش مرتبط بأي حاجة عاطفية، زي إن يبقاله أسرة أو حبيبة، أو حتى أصحاب. ولكن في الذئاب، العكس هو الصحيح، الدراسات بتقول إن هذه النوعية من الذئاب نوعية قليلة جدًا، %15 بس من ذئاب العالم هما ذئاب منفردة، هما الاستثناء مش القاعدة. كمان، اللي بيدوّر عليه الذئب الوحيد دا ما هو إلا ذئب تاني. "معناه إيه يا (أبو حميد) الكلام دا؟ انت قصدك إنه بيحاول يكوّن جماعة جديدة؟ ما هواش Independent ومعتمد على نفسه، وعايز يعيش فرداني كدا؟" الباحث "إيريك زيمين" المتخصص في سلوك الكلاب والذئاب بيقول إن أحيانًا الأكل بيقل في المنطقة فيبقى فيه عدوانية بين القطيع، الحيوانات الصغيرة اللي مش أهل للمنافسة، بتروّح، بتمشي، من سن سنة أو سنتين مثلًا، أو يكون هناك ذئب صغير بيتعرّض لتنمُّر من ذئب كبير، فبيأذيه جسديًا وما يسيبهوش ياكل. كل دي، يا عزيزي، ممكن تبقى دوافع، ولكن ليست هي السبب، السبب الحقيقي في الرحيل هو الانتشار، الذئب بيسيب القطيع عشان يروح يكوّن قطيع خاص بيه هو، ويستعمر منطقة جديدة، ويبقى هو والأنثى اللي هيقابلها زعماء القطيع الجداد. المفاجأة، يا عزيزي، إن نظام القطيع دا ما بيحصلش في سياق ديكتاتوري. عالم الأحياء الأمريكي "دافيد ميش"، المتخصص في دراسة الذئاب، بيقول إن المصطلح "الذئب المسيطر" أو الـAlpha Wolf، اللي بيتقال على قائد مجموعة الذئاب، دا مصطلح مُضلِّل، لأنه بيدّي إحساس إن الذئب الـAlpha دا اتنافس واتعارك وضرب يمين وضرب شمال، عشان هو يبقى قائد القطيع، ودي، يا عزيزي، حاجة ما بتحصلش غير في الحبس، لمّا تبقى الذئاب دي محبوسة. ولكن الحقيقة إن اللي وصّل الذئب الـAlpha إنه يبقى Alpha، إنه اتجوز وخلّف نسل بقوا هما أفراد القطيع، بقى راجل البيت باختصار، القطيع هما أُسَر مكوّنة من آباء وأبناء وإخوات، وممكن كمان بعض الأعمام والعمات، وأحيانًا، الذئاب الغريبة اللي القطيع وافق إنه يضمها. طب ليه الذئب الوحيد ما يتجوزش من نفس القطيع؟ دي حتى منطقة الذئاب 2000 كيلو، وهما أول عن آخر 9 لـ10 ذئاب، الدنيا مش زحمة يعني، ليه الفرهدة دي؟! خلّيني أقولّك، الذئب في قطيعه لو اتجوز، هيبقى بيتجوز جواز قرايب، ومش محتاج أقولّك، يا عزيزي، جواز القرايب بيعمل إيه، بيجيب الفقر في الجينات، عشان كدا، يا عزيزي، تلاقي الذئب لمّا ييجي يتجوز ذئبة، يحاولوا يختاروا ألوان مختلفة لبعض، لمّا هو يتجوز من قطيع تاني، بياخد صفات كويسة منه، جسم أكبر، مناعة أقوى، قوائم أسرع، فك أشرس، أو مش لازم تبقى صفة أفضل، ممكن تبقى بس صفة مختلفة، فتعمل تنوع جيني. سنة 1893، صياد محترف وعالم طبيعة اسمه "إرنست تومبسون"، وصل إلى ولاية "نيومكسيكو" عشان يأدي مهمة بعينها، فيه ذئب خارج عن القانون، السكان سموه "لوبو". "لوبو" كان ذئب رمادي اضطر إنه يصطاد الماشية، بعد ما مستعمرات البشر قضت على فرايسه الطبيعية، وحصل اتفاق مع "تومبسون" على مكافأة قدرها ألف دولار، مقابل راس "لوبو"، قائد المجموعة! "قُدّامك أسبوعين بس، هه؟ وتجيبلي راس (لوبو)!" "تومبسون" كتب حكايته مع "لوبو"، ونشرها في كتاب بعنوان Wild Animals Have Known، حطّله 5 قطع من الطُعم، عبارة عن حيوانات مُسمّمة، وغطّى ريحته البشرية بعناية، وحط الطُعم دا في منطقة "لوبو"، تاني يوم، الـ5 حيوانات المسمومة اختفوا، فتوقع "تومبسون" إن "لوبو" مات لمّا كَل الحيوانات اللي فيها سم، لكنه، يا عزيزي، بعد فترة، لقى إن الطعوم كلها متغطية في كومة من البراز، وكأن الذئب بيقولّه، "العب غيرها!" فاشترى مصايد جديدة ومتخصصة، وخفاها كويس جدًا، لكن كل دا ما جابش نتيجة، لمّا لقى بالأخص علامات رجلين "لوبو" بتستكشف كل الفخاخ فخ فخ، المهمة اللي كانت المفروض تخلص في أسبوعين، قعدتلها أكتر من 4 شهور، 4 شهور من المحاولات الفاشلة! وفي ليلة من الليالي، أثناء بحث "تومبسون"، بيتتبع آثار أقدام "لوبو"، ولقى جنبها آثار أقدام ذئب أصغر، وهنا، يا عزيزي، عرف نقطة ضعفه، رفيقته، ذئبة بيضا سمّاها "بلانكا". ابتدا "تومبسون" يعمل أفخاخ تانية، يستهدف بيها حبيبة القلب السَنيورة "بلانكا"! كان بيحطلها في الأفخاخ دي رؤوس ماشية، وبالفعل، يا عزيزي، "بلانكا" بتقع في الفخ. لمّا بتقع "بلانكا" في الفخ، "تومبسون" بيروح للفخ يبص عليها، فبيلاقي "لوبو" جنبها، وهي على الأرض بتتألم، "لوبو" لمّا شاف البشر جايين، جري لمسافة آمنة عشان يراقبهم، وشافوهم وهما بيحاصروا حبيبته وبيقتلوها وبيجرّوها بخيولهم. "تومبسون" بيحكي إنه فضل يسمع عواء "لوبو" لمدة يومين، المرادي، مش عواء عالي ومتحدي، دا طويل وحزين ومليان حُرقة! وبعد اختفاء الناس، "لوبو" فضل يمشي ورا آثار "بلانكا"، لحد ما وصل للمزرعة اللي حبسوا فيها جثتها، الحزن اللي كان فيه كان مأثر على إحساسه بالحذر، ما أدركش إن الطُعم المرادي كان ريحة "بلانكا"، وفي 31 يناير 1894، اتقبض على "لوبو" بمصيدة قفلت على رجوله الأربعة، وبرغم إصاباته، إلا إنه لمّا شاف الصياد وقف، واستمر في العواء. "تومبسون" ورجالته كمموا بُقه، وثبّتوه على حصان وخدوه المزرعة، سلسلوه وربطوه في مملكته اللي سيطر عليها لسنين، رفض إنه ياكل أو حتى يبصلهم. "تومبسون"، الحقيقة، حاول يحتفظ بـ"لوبو" على قيد الحياة، ولكن يُقال إن "لوبو" مات بعد 4 ساعات، مش من الإصابات، ولكن من الحزن! احتفظ "تومبسون" بفرو "لوبو"، اللي اتنقل بعدها لمتحف في "نيومكسيكو"، وكتب قصته اللي ساهمت في تغيير وجهات النظر تجاه الحيوانات البرّية، وكان سبب إن مع نهاية القرن الـ20، تتوجد سياسات للحفاظ على الحياة البرّية، وبرامج لإعادة الذئاب للبرّية وحمايتها. الذئاب، بطبيعة الحال، بتشكّل خطر، بس فيه فرق كبير بين إن احنا نتجنبه وندافع عن ممتلكاتنا، وبين إن يكون فيه رياضة لهزيمة الذئاب، وبين إن يبقى فيه رياضة لاصطياد الذئاب وتبقى مصدر للتفاخر بين الناس! فيه حملات إبادة حصلت، خلّت الذئب في بعض المناطق مُهدّد بالانقراض. انت متخيل، يا عزيزي، احنا بنعمل في الذئب إيه! الذئب اللي قِدِر يحتوي أطفال، زي ما حصل في "الهند"، كأنهم فرد من قطيعه! الذئاب زينا، استمدوا قوتهم من أعدائهم، واتطوروا في عائلات، عندهم حياة عاطفية كاملة، بيلعبوا وبيحبوا، بيأدّبوا صغارهم وبيزعلوا على موتاهم، ليهم شخصيات مختلفة زينا، بعضهم قادة وبعضهم عُشّاق وبعضهم مغامرين، احنا الاتنين كائنات Territorial، هما بيعووا عشان يطالبوا بمنطقتهم، واحنا بنعمل منطقتنا بأسلاك شايكة وبحدود. حتى قتل الذئاب للذئاب في حروب النفوذ، هو السبب الطبيعي الأول لموت الذئاب، وبرضه البشر كدا، احنا كبشر أكتر ناس بتقتل بشر على الكوكب. وعلى رأي "ريك لامبلوج"، مؤلف كتاب The Temple of Wolves، إننا والذئاب بنحب نفس اللحمة، البقر والضاني والغزلان، ودا يمكن يكون سبب الصراع الحقيقي. "يا نهار أسود يا (أبو حميد)! يعني المعركة دي كلها معركة على الهُبَر؟!" للأسف، يا عزيزي، هو دا سبب الصراع الحقيقي! إعدام الذئاب، غير إنه ظالم، بس عمره ما كان حل لنهاية المعركة دي، الدراسات اللي اتعملت عن تأثير إزالة المفترسين، بتأكد إنها نادرًا ما بتنجح. أشهر مثال، لمّا المزارعين اشتكوا إن الفهود بتاكل الأغنام، في "جنوب أفريقيا"ً، فأعدموهم إعدام شامل. الإحصائيات وجدت إن دا، في النهاية، زوّد خساير الثروة الحيوانية بنسبة 27%. لأن، يا عزيزي، زي ما شُفنا في إحدى الحلقات قبل كدا، المفترسين جزء أساسي من النظام البيئي، بيتحكموا في عدد الفرايس والمفترسين الصغيرين، زي الراكون والعِرَس! النظام البيئي شبكة معقدة، والخدمات اللي بيقدمهالنا ما تتعوضش، ومن الحكمة إننا نحافظ عليها، والحل، يا عزيزي، في التعايش، نبني حظائر متأمنة ونحاوطها بأسوار عالية، نحترم طبيعتهم، فما يضطروش يهاجمونا. ولكن، يا عزيزي، الإبادة بتيجي على دماغنا احنا في الآخر، لأن احنا كل ما بنعرف أكتر، كل ما بندرك إن شيطنة المفترسين ومعاداتهم مش في صالحنا، وبنحترم كونهم جزء من النظام، اللي بيحافظ على حياتنا ورفاهيتنا. بس كدا، يا عزيزي. لو انت مش ذئب، أرجوك، شوف الحلقات اللي فاتت، شوف الحلقات الجاية، انزل بُص على المصادر، لو احنا على الـ"يوتيوب"، على القناة. انت عارف، يا عزيزي، إن "لوبو" لمّا راح رفع قضية على الناس اللي قتلوا حبيبته، عارف كلّم مين؟ عارف طبعًا، يا عزيزي، كلّم أنهي المحامي! - "هو يا (أبو حميد)؟!" - أمّال! "إفيه" متوقع شوية، يا عزيزي، بس مهاراتي في رمي الـ"إفيهات" ما عادتش بالحرفنة بتاعت زمان. محتاج أتمرّن شوية!