خطر الكلب الدحيح

حسبي الله ونعم الوكيل! أنا مش عايزك تضايق نفسك يا "رفيق" بيه، كل حاجة هتتحل، إن شاء الله. شكرًا يا "أحمد"، انت الوحيد اللي ما طلعتش خاين. "ريكس"، حبيبي. شايف عمو "أحمد"؟ "أحمد" الـ"شوفير"، طلع رمز للوفاء. حضرتك أكيد تقصد "وفاء" مرات حضرتك. لأ. أنا بتكلم عن الوفاء بشكل عام. "وفاء" مرات حضرتك، اللي خانتك مع أستاذ "باسم"، صديق عمرك، وشريكك في بيته. أولًا، البيت مش بيته، دا إيجار جديد أصلًا. ثانيًا، ما كانش صاحبي، ولا عمره. هو بس كان لاصقلي. لأ، كنت بتحبه، وكنت بتاخد مني العربية وتروح تجيب ولاده من المدرسة. أبدًا! والله ما حصل! "بيسو"؟ دنا كنت بقرف آكل معاه في طبق واحد! خلاص، ما تزعلش، كان صاحبي أنا. "باسم بيه السيوفي" و"أحمد" السوّاق، طول عمرنا "دويتو"! حتى ولادي، خدوا فلوسي كلها ومشيوا! معقول! مفيش حد جنبي؟ انزل يا "ريكس"! مفيش كائن كدا يقف في ضهري؟ يا حبيبي، اقعد خلاص، اقعد، انزل. مفيش حد يخاف عليا ولا على أملاكي؟ معقول! معقول يا "ريكس"، انت اللي بتضيع القلم؟ !Sit. Sit شايف يا "أحمد"؟ شايف؟ أنا لوحدي تمامًا! يمكن ما فاضلش غيرك انت، والـ"مايباخ" السودا. بصراحة كمان، ما بقاش فاضل غيري أنا. الـ"مايباخ" أنا بعتها لنفسي بالتوكيل... - إيه؟! - ...وابتديت أشغلها "أوبر". هتشغّل الـ"مايباخ"، "أوبر"، يا "أحمد"؟ دا انت كنت من أخلص مساعديني! لا ما أنا غيّرت المساعدين خلاص، شدّيت العفشة كلها. إخص عليك يا "أحمد"! عن إذنك بقى يا "رفيق" بيه، أشد أنا كمان. عايز حاجة؟ صحيح! ديل الكلب عمره ما يتعدل! استنى يا "أحمد". استنى. أنا أدركت إدراك خطير أوي. وانت ماشي، اتفضل خُد "ريكس" معاك. هو دا السبب في المشاكل اللي احنا فيها دي كلها. أنا وحيد بسبب "ريكس". كل يوم، يا عزيزي، وانت بتفتح باب البيت وبتخرج، فانت بتفتح باب لعدد لا نهائي من السيناريوهات، اللي ممكن تحصلّك. بعضها قادر يغيّر حياتك. مئات السيناريوهات، أنا شخصيًا بتخيلها كل يوم. الأسانسير اللي بيعطل وأنا جوا، الـ"تاكسي" اللي الفرامل بتاعته سايبة، مديري اللي في الشغل، اللي بيطع مسدسه من الدُرج، وبيهددني عشان ما حققتش الـ"تارجت". سيناريوهات كتير، يا عزيزي، ممكن تؤدي في الآخر إلى فنائك. ولكن قبل ما أوصل الأسانسير أو أركب الـ"تاكسي" أصلًا، فأنا محتاج أواجه الكلب اللي مربوط برة! "إيه دا يا (أبو حميد)؟ انت بتخاف من الكلاب؟" يا عزيزي، أنا ما بخافش من الكلاب، أنا بجتنب أذاهم. وخلّيني أحكيلك حكاية "جاكلين ديوراند". طبعًا، يا عزيزي، انت ما تعرفهاش، وأنا ما كنتش أعرفها، بس دي بنت أمريكية كانت خبيرة في الـDog Setting. "بيبي سيتر" كلاب يعني! وهذه البنت الجميلة قبل الـ"كريسماس" بيومين، راحت بيت ناس، تعمل شغلها. وكانوا سايبينلها الباب مفتوح، بعد ما خرجوا. الكل كان متطمن إنها قعدت مرة مع الكلبين. ولكن لمّا دخلت عليهم، هاجموها ونهشوها. وانت فاهم طبعًا إيه اللي حصل! كام عضة يا عزيزي؟ 800 عضة! 30% من دمها اتصفى. قلبها وقف كذا مرة على ترابيزة العمليات. باختصار، نجت بمعجزة، ودا بقى شكلها بعد العمليات. إنقاذ البنت اتأخر حوالي 37 دقيقة كاملين. مش لحد ما البوليس وصل البيت، ولكن لحد ما قدروا يضربوا الكلاب بالنار وينقذوها. واحد يقولّي، "معلش يا (أبو حميد)، يعني الكلبين كانوا سلالات عنيفة ومش بترحم؟" عزيزي، القصة أعقد من كدا بكثير. "والله يا (أبو حميد)، القصة دي رعبتني، أنا هموت دلوقتي وأفهم، أول إنسان استأنس الكلب، كان بيفكر في إيه؟" تصدّق يا عزيزي؟ انت كويس! لأ، يا عزيزي، انت فعلًا أبهرتني. سؤالك منطقي وصح جدًا، وفي صلب الموضوع. أصل فعلًا، تخيل تروح الغابة وتجيبلي ذئب تلعبله في بطنه وتهرشله في شعره، وتقولّه Sit. ومتوقع منه يبقى Good Boy؟ هل بذمتك دي خطة منطقية؟ "صح يا (أبو حميد)، دي خطة مش منطقية ومستحيل إنها تنجح!" انت انتكست، اكشف، ورجعت أهوج من الأول! يا راجل، بوقّعك. يا عزيزي، طبيعي تكون نجحت. ما هما تحت البيت، وبيرازونا ساعة صلاة الفجر. مستأنسين. الخطة فعلًا نجحت، وتم بالفعل استئناس الكلاب. ودا شيء ينرفز، لأنها خطة عشوائية جدًا. ولكنها نجحت نجاح ساحق لعشرات الآلاف من السنين، وأصبح الكلب، هو تقريبًا، أقدم حيوان استأنسه الإنسان، في تاريخه. لكن برضه، الإنسان معذور، يا عزيزي، البشر القدامى كانوا بيبصوا للذئاب على إنهم أنداد وخصوم ليهم، بيعيشوا في قطيع زي البشر، بيصطادوا في جماعات زيهم. مش بيعتمدوا على الجري السريع، ولكن على المشي لمسافات طويلة. بيحاصروا الفريسة لحد ما تتعب وتُنهك، وبعدين يهجموا عليها، مش بيحبوا يصارعوها ويتغلبوا عليها، زي الأسود مثلًا. سلوكيات البشر والذئاب كانت متشابهة في الحتة دي. أخصام وأنداد. تخيل بقى، يجيلك حد من أخصامك دُول، بعد ما انفصل عن قطيعه أو انطرد منه، ويعيش جنبك وياكل بقايا أكلك، هتعمل معاه إيه؟ تطرده؟ ولّا تقولّه، Good Boy؟ البشر قالوله، Good Boy. ودا منطقي لسبب. الذئاب كانت بتتفوق على البشر في حاسة الشم، أحسن من البشر حوالي 10 آلاف مرة. يقدروا يشموا الفرائس من على مسافة ميل. فانت، يا عزيزي، لو جالك ذئب، هو هيفيدك. ومن هنا، الموضوع بيعدّي مئات القرون، من استئناس الذئاب، والـArtificial Selection، الانتخاب الصناعي، بينتج عنه مئات السلالات من الكلاب، اللي عايشة معانا لحد النهاردة. الكبير والصغير والشرس واللعبي والمخيف والـ"كيوت". وهما، بصراحة، "كيوت"، يا عزيزي. يعني، الصراحة، ما ننكرش يعني! أجسام البشر والكلاب، لمّا بيقعدوا مع بعض، بيطلعوا أوكسيتوسين. هرمون الحنية كلها. اللي بيلعب دور في إفراز لبن الأمهات. هرمون الربط بين الأم وطفلها هقولّك، يا عزيزي، معلومة لطيفة، الكلب بيقدر يميز 150 كلمة. ويقدر يعدّ لغاية 5، ويفهم إن 1 + 1 = 2. "يا سلام يا (أبو حميد)، طب ما أنا بفهم إن 1 + 1 = 2! إيه المبهر في دا؟!" انت ليه حاطط نفسك في المقارنة يا عزيزي؟ ما أنا عارف إن انت كدا، وانت المفروض تبقى كدا. دا شغلك! عزيزي، الكلب يمتلك IQ طفل عنده سنتين. "كيوت" أوي. بس الأرقام برضه بتقول إنهم ذئاب، لسة مش ناسيين أصلهم. في "أمريكا"، فيه أكتر من 4 مليون ونُص عضة كلب، بتحصل كل سنة. وكل سنة، الكلاب بتقتل في العالم من 30 لـ40 ألف إنسان. افتكر، يا عزيزي، قصة "جاكلين". فدُول ذئاب، أصلهم ذئاب! والذئاب ممكن تشرّح وتدشمل وتقتل، بس يمكن لأ برضه. أصل الـ4 مليون ونُص عضة كلب بتوع "أمريكا" دُول، منهم 800 ألف بس اللي بيحتاجوا رعاية طبية من أي درجة. دكتور "عاطف"، بتاع "بالطو"، يكشف عليه، عادي. 81% من حالات العض، مش بينتج عنها إصابة تستاهل الانتباه. فأينعم هما بيهجموا، ولكنها ليست هجمات بخطورة الذئاب. "عندي يا (أبو حميد) سؤال، هتجده ذكي المرّادي، أوعدك. هل هما كلاب مستذئبة، ولّا هما ذئاب متكلببة؟" إيه السؤال الكلبوب دا؟! "ولّا يا (أبو حميد)، يكونوا كلاب ناسيين أصلهم معظم الوقت، بس أحيانًا بتحصل حاجات تفكرهم، وتخلّيهم Aggressive وبيهاجموا؟" - سؤال حلو! - "بجد؟" "بجد يا (أبو حميد)؟ أنا حاسس إن انت هتقول (أهوج)!" لأ، لأ، السؤال كويس. - "بجد يا (أبو حميد)؟" - ما خلاص يا عزيزي. ممكن نكمل الحلقة بقى؟ الحيوانات، يا عزيزي، في الغالب، بتهاجم البشر في حالتين، إما إنهم بيعتبرونا فرائس، ياكلوها، ودا سلوك نادر، طعمنا مُرّ. أشهر مثال على دا، هو الدب القطبي. أو لأنهم بيهاجموا، لأن هما في موقف ما، حسوا بالخوف. بيهاجموا هجمة بيسموها الـDefensive Attack، زي الدب البني كدا، يا عزيزي. الكلاب، يا عزيزي، بترجع ذئاب لمّا بتخاف. وخوف الكلاب أو الحيوانات مختلف عننا. هما مش بس بيخافوا من الزمن، أو على شكلهم قُدّام المجتمع، مش بيخافوا من مجازات، ولكن بيخافوا من تصرفات. بيشوفوا هذه التصرفات على إنها علامات خطر. منطقنا، غير منطق الحيوان. الغرائز هي اللي بتحكم تصرفات الحيوان أكتر. لأن ما عندهوش قشرة مخية، ولا مراكز عليا للتفكير والحكم. دا، يا عزيزي، الغريزة هي اللي سايقاه، غرايز البقاء، الأكل، التزاوج، والحماية. حماية الجراء الصغيرة، وحماية السيد بتاعه، وبقية الناس اللي من طرفه. أي حاجة تيجي من ريحة الحبايب! ببساطة شديدة، الكلب لو خاف على حياته، هيهاجم وهيعض. الكلب، يا عزيزي، لو اتزنق و"اتكرنر"، هيعض ويبهدل الدنيا. ما ينفعش الكلب يحس بالخطورة أو التهديد من شخص، أو يتساب في حالة استنفار منبعها الخوف. حتى الخضة العابرة، ممكن تخلّي الكلب يعض. دا طبعًا، ليس معناه إن كل كلب خايف هيبقى Aggressive، وبتاع الـ"دليفري" يشهد. بس كل كلب Aggressive، غالبًا، بيبقى خايف. لكن، يا عزيزي، الموضوع ما وقفش عند كدا وبس. عُمرك، يا عزيزي، شُفت فيديو لفرس النهر وهو بيتبرز، وفي نفس الوقت، بيحرك ديله بمنتهى السرعة زي المروحة؟ دا، يا عززي، مش Multitasker، ولا بيهوّي على الحبايب. تعرف، يا عزيزي، هو بيعمل كدا ليه؟ عشان ينشر البراز والريحة. "انت مالك يا (أبو حميد) بتقولها بفخر كدا ليه؟ هو هينشر في معرض الكتاب؟" مهو بينشر يا عم فيرموناته! فرس النهر هنا، يا عزيزي، بيحاول يحدد مناطق نفوذه، ويعلمها بريحته. دا سلوك Territorial، هو هنا، بيحدد منطقته. والحيوانات كلها عندها السلوك المناطقي دا. الكلب حاسم جدًا وعدواني مع أي حد بيقرب لحدوده ومنطقته. الكلب بنسبة 50% هيعض، لو تخطيت حيز نفوذه. كنت قريت إن عشان كدا، أكتر ناس بتتعرض للهجوم أو العض، هما سعاة البريد وبتوع الـ"دليفري". وهي دي الغلطة، اللي فيها صحاب الكلبين، مع "جاكلين ديورين"، اللي حكيناها عنها في أول الحلقة. في الليلة المشئومة، اللي دخلت عليهم فيها، في غياب صحاب البيت، CTRL + دي، يا عزيزي، حُط تحتها خط. وفي حين إن الكلبين لسة مش واخدين عليها كفاية، فتصرفهم كان حماية لمنطقتهم ومنطقة سيدهم. خلّيني، يا عزيزي، أحدثك عن التطعيمات. انت عارف، يا عزيزي، إن الكلاب مش هي بس اللي بتنقل السعار؟ التعالب والسناجب والفيران، بتنقله برضه. حتى القطط بتنقله، بتنقله يمكن أكتر من الكلاب، في بلاد زي "أمريكا". لأن الكلاب الضالة هناك قليلة، والقطط بتتساب تتجول براحتها، أكتر من الكلاب. Actually، في "أمريكا"، احتمال إن حد يموت من عضة كلب، حوالي 1 من 112 ألف. خلّي بالك، يا عزيزي، ضِعف هذا الاحتمال موجود مع قرصة دبور أو نحلة، وعشان دي "أمريكا"، فاحتمال إن حد يموت بطلق ناري، تقريبًا 1 على 7000. يعني، الرصاصة في "أمريكا"، أخطر عليك من الكلب. بتخاف في الشارع من البني آدمين، مش من الكلاب. وقليل البخت، يعضه الكلب في "نيو جيرسي"! في الدول النامية بقى، الموضوع مختلف، لأن الكلاب الضالة فيها أكتر. يعني، جوع وضعف وأمراض، وإصابات من حروب مع كلاب تانية. إساءة معاملة وعدم ثقة في البيئة والناس. أنا مش عايز أقولّك، يا عزيزي، العيال الصغيرة بتعمل إيه! والله ما عايز أقول! دا غير، يا عزيزي، مش الخوف المستمر، الرعب المستمر. بمعنى، إن احتمالات الهجوم والعض قائمة. وهما كمان السبب الأهم في العضات المسببة للسعار. وعضة سعار يعني 21 حقنة من المصل. Actually، يا عزيزي، هما ما بقوش 21 حقنة. ابقى قول المعلومة دي بقى قُدّام البنات بقى وكدا وإيه... الطب، يا عزيزي، اتقدم عن كدا بكتير. بس الأسطورة بتاعت ماما، لازم نكملها يعني. لأنها مرتبطة بحماية الأطفال. في فلسفتي البراجماتية، الأفضل أن تكون خيّر على أن تكون على حق. احنا يهمنا إيه في الآخر؟ مش إن العيال ما تتعضش من الكلاب؟ حقنة بقى، 21، 18، هو أنا بتاع سرنجات؟ أنا مالي! أنا عايز العيال ما تتعضش. أما بقى، يا عزيزي، الكلاب الضالة، فهما موضوع مختلف. خُد بالك، يا عزيزي، الكلب دا ما لهوش صاحب، حرفيًا. مُعرّض للجوع والأمراض والقتل، مش بس من الإنسان، ولكن كمان من ولاد جيرته، من نفس نوعه. الكلاب اللي بيتحاربوا مع بعض، سواء عنده سعار أو ما عندهوش. "بس معلش يا (أبو حميد)، ليه ما نقولش إن كلاب الشارع أساسًا سلالة شرسة؟ وقد تكون دي طبيعتها، اللي بتفرضها عليها جيناتها؟" بالفعل، يا عزيزي، ربط السلالات بالشراسة، دا من الحاجات المشهورة فعلًا. يعني، مثلًا، أغلب الهجمات القاتلة للكلاب، مرتبطة بسلالات زي الـ"بيتبول"، والـ"روتفايلر" والـ"جيرمان شيبارد". الـ"جيرمان شيبارد" دا، يا عزيزي، كلب شكله ذئبي جدًا. حجمه يمكن أقل بشوية، وفكه ومخالبه يمكن أقل قوة من الـGrey Wolf، ولكن إيه؟ جيناتهم متطابقة. خلّيني أقولّك، يا عزيزي، الـ"بيتبول" سمعته، كسلالة، سيئة جدًا. اسمع دي، يا عزيزي، 66% من هجمات الكلاب القاتلة من السلالة بتاعته. هو السبب فيها. هو رقم 1 في عدد الهجمات على البشر في "أمريكا". حوالي 3400 حالة هجوم اتسببوا في 295 حالة وفاة. الأرقام دي، يا عزيزي، للوهلة الأولى ممكن تدّي انطباع إن هذه السلالة شرسة وعنيفة. ومحتاجين نخلص منها. ولكن دا، يا عزيزي، كلام مش دقيق. الـ"بيتبول"، يا عزيزي، هو أكثر كلب بيتشرس. خُد بالك، يا عزيزي، إن التشريس غير التدريب. الكلاب ممكن تتعلم سلوك معيّن، يخليها قادرة على الحماية وملاحقة المجرمين، والكشف عن المخدرات في الـ"مولات" والمطارات. عندي "مول" جنبي كدا، يا عزيزي، بدون ذكر أسماء، عنده كلبين كدا متقاعدين، في سن المعاش كدا، وكل واحد فيهم مالي مركزه، حليق الرأس، أشيب الفودين. بييبجوا يشمشموا كدا، يا عزيزي، ودايمًا منحنيين كدا، تحس إن هما في حالة بؤس رهيب. قال يعني هما بيشموا إذا كان فيه متفجرات في العربية، ولّا فيه مخدرات، ولّا فيه أي نيلة على دماغهم. ما ترحموا الكلاب! صدّقني، يا عزيزي، أيًا كان اللي حاطه في العربية، ما بيدوش أي رد فعل. هتجيب من الـ"فود كورت"، هه؟ هتجيب "هوت دوج"؟ وهنا، الكلاب تم تدريبها، وبقت في غاية القوة والحسم، من غير لا غباوة ولا غشومية ولا إجرام. أما بقى، يا عزيزي، التشريس، فهو فكرة قائمة على إساءة معاملة الكلب. ضرب وإهانة وعزل وحبس. كل دا، يا عزيزي، بيطلعلنا كلب خايف ومضطرب ومضغوط، وبالتالي، شرس وخطر فعلًا، حتى على صحابه! دا بيحصل إما عن قصد وتخطيط، زي ما كان بيحصل وقت مصارعة الكلاب، اللي هي بالمناسبة، ممنوعة قانونًا في العالم كله. أو عن جهل أو مرض نفسي من مُلّاك الكلاب. الـ"بيتبول" بقى كان أكتر كلب بيتم تشريسه والرهان عليه في مصارعة الكلاب. أكتر كلب سمعته وحشة. وبالتالي، بيقعد في الملاجئ أكتر من غيره، ودا، يا عزيزي، مؤثر على نفسيته وسلوكه، ومنطقي إن الحالة اللي بتحصلّه من العزلة دي، تخلّيه أكثر عدوانية. والسمعة بقى، بتخلّي أي حد يتعض، يقول الـ"بيتبول". "هو الـ(بيتبول) دا!" ومن هنا، يا عزيزي، ابتدا يحصل، عارف انت؟ Loop. الإحصائيات بتاعت هجمات الـ"بيتبول" بدأت تزيد، وبرضه، راعي إن مش كل الناس خبراء في السلالة. أنا مثلًا، يا عزيزي، مش خبير سلالات. دي بقى، يا عزيزي، لمعلوماتك، معلومة كدا، خُدها. إن الكلاب الصغيرة Aggressive أكتر. "بجد يا (أبو حميد)؟" "ممكن تقول تاني وتشرحلنا؟" الكلاب الصغيرة Aggressive أكتر. "إيه دا يا (أبو حميد)؟ دا انت عظيم!" المهم، يا عزيزي، الكلاب الصغيرة، احتمالية إنها تعض، أعلى بكتير من الكلاب الكبيرة. بيبقوا Insecure. ولكن الضرر منها قليل جدًا، فالناس بتنساه. والتبليغ عن هجماتهم نفسه بيقل أو بينعدم. زي مثلا، المسدسات والبنادق، انت عارف، يا عزيزي، إن هما بيقتلوا أكتر من القنابل النووية، زي ما قلنا في حلقة الـAK 47. بس احنا هنفضل فاكرين القنابل النووية أكتر، لأنها Theatrical، شكلها مسرحي أكير، تدميرها أكبر. لو عندك، يا عزيزي، كلب مستأنس، بتاع صاحبك مثلًا، يبقى نصيحتي ليك إن انت تقربله بحذر وفي وجود صاحبه، وبإذنه. خلّي إيدك جنبك وسيبه هو ييجي يستكشفك الأول، لا مؤاخذة كدا، يتعرف على ريحتك. لمّا، يا عزيزي، تمد إيدك، يبقى لدقنه تحت فكه. اوعى تطبطب على راسه. انت مش أمه. واوعى تقربله في هذه الحالات، لو صاحبه مش موجود، أو لو داخل عليه منطقته اللي هو بيحميها. طبعًا، يا عزيزي، مش محتاج أشرحلك هو بيظبط حدودها ازاي. أو جنبه طفل سيده اللي هو بيحميه. أو لو بينكم سور. لو بياكل أو بيلعب أو بيزمجر. وخصوصًا، يا عزيزي، لو كان ذَكَر، وعرفت إن هو في فترة التزاوج، أو مريض لأي سبب. ولو كلب شارع، يُستحسن ما تقربش منه في العموم، ولا تيجي جنبه. "ليه يا (أبو حميد)؟ هو موظف؟ هو مقريف؟ بيشتغل امتى؟ الله! عايز أطبطب على الكلب وألعب معاه! مش بقالي عشرات الآلاف من السنين عمّال بستأنسه؟ فيها إيه لمّا حقي، كإنسان، أستخدمه؟ ما أقربلهوش وهو بيلعب ولا وهو تعبان ولا وهو عنده مرض، أمال أقرب منه امتى؟ وهو بيبعت إيميلات؟" والله، يا عزيزي، أنا حذرتك وعملت اللي عليا! انت بقى جريء وقلبك ميت، اتفضل يا عم! بس، يا عزيزي، خلّيني بس عشان أبقى أديت رسالتي معاك، لو الكلب هاجمك، هنصحك نصيحة، اوعى تجري! لأن انت كدا أولًا، بتستفز غريزة الكلب في المطاردة، لو لقاك بتجري هيعرف إنه ركب، هيجري وراك. وصدّقني، صعب إن انت تبقى أسرع من الكلب. احنا عارفين كويس الحالة عاملة ازاي! معظم الكلاب، يا عزيزي، أسرع مننا في الجري. ثانيًا، انت لمّا بتجري، بتغذي شعور الكلب في السيطرة، الكلب مش بس ساعتها بيشم الخوف، دا بيشوفه. ولو شافه، هيحس إنه سيد عليك. ودا بيزوّد احتمالات إنه يهجم عليك. حاول، يا عزيزي، تقف وما تبصش في عينه، كدا. دا، يا عزيزي، بيدّي رسالة للكلب إن انت مش مصدر تهديد ولا مهتم بيه. وبالتالي، ما بتشكلش عليه أي خطورة. وقولّه، يا عزيزي، بصوت عميق وبحسم، "لأ، وقّف!" أو قولّه Stop، يا عزيزي، يكون ما بيفهمش عربي ولّا حاجة، تبقى عامل حسابك. الحق يا لا، بيشتمني بأمي. بس دا، يا عزيزي، يجب إن هو يكون بصوت قوي وحازم. اوعى يا عزيزي تتوتر والنبي! اوعى الصوت المسرسع دا يطلع! هيخلّي موقفك قُدّام نفسك وقُدّام الكلب، مش حلو. حاول كمان، يا عزيزي، تشتت الكلب. لو في إيدك حاجة مثلًا، ارميها، يمكن يجري وراها. هو، يا عزيزي، IQ طفل سنتين فانت برضه، يعني، راعي إن انت في السلم التطوري أعلى شوية، فاستغل الحاجة اللي تميزك عنه، ما تقومش طالع تجري. انت عندك رجلين، هو عنده 4. لو، يا عزيزي، بعد كل هذه النصايح، والكلب ما كانش طايقك، وقرر إن هو يجري عليك، فقُدّامك، يا عزيزي، سيناريو من 2، حاول تحط حاجز بينك وبينه، يعني، شنطة، أي حاجة معاك. وممكن تتكور على نفسك كدا في الأرض، بوضع يخلّيك تحمي وشك ورقبتك، وربنا يتولاك. انت بس اقعد جنين كدا، وهو يعني اللي يطوله هيعضه. إن شاء الله، ما يطولش حاجة يعني. إن شاء الله تيجي في سمانة، فخدة، بتتلم وبتُرزق يعني. المهم، يا عزيزي، تبقى ساكت تمامًا، وضامم صوابعك في هيئة قبضة. خد بالك، يا عزيزي، أطراف الصوابع سهلة في العض. اوعى يمصمص إبهامك! السيناريو التاني، يا عزيزي، هو إن انت تـFight Back، تنزلّه كلب لكلب. عايزك، يا عزيزي، تفتكر حاجة، مناخير الكلب وقفاه هما نقط ضعفه. تفادى سنانه يا عزيزي! أتمنالك، يا عزيزي، ربنا يوفقك، وتفتكر المعلومات دي وقت الهجوم. عشان أنا حاسس إن أنا بالرغم من إن أنا قايلهالك، لو جاني كلب، هطلع أجري! لو حصلت عضة، يا عزيزي، لا قدّر الله، لازم تغسلها كويس بالميّه والصابون. لو دا كلب مستأنس وموثوق فيه وواخد تطعيماته، ممكن يتم الاكتفاء إن صاحبه يعزله 10 أيام. وفي الغالب، ما بيكونش فيه أعراض ولا سعار. لكن لو انت شاكك، ودا كلب ضال، وعضك وهرب، اعتبره مسعور احتياطي، وساعتها يجب إن انت تروح المستشفى المتوفر فيها مصل الكلب. بس كدا، يا عزيزي. أظن انت دلوقتي مستعد وجاهز تمامًا. انطلق، وربنا يحفظك إن شاء الله ويحفظني. ما تنساش تشوف الحلقات اللي فاتت، تشوف الحلقات اللي جاية، ننزل نبص على المصادر، ولو احنا على الـ"يوتيوب"، نشترك على القناة. معلش بقى، يا عزيزي، عن إذنك بقى، أروح أحدد منطقتي.