فن فك الشفرات الدحيح

زي ما بأقولّك، يا فندم، الرسالة دي لسة مبعوتة من العميل 111. الكلام دا خطير جدًا، 111 اتخطف في مهمة في "الهند" من سنتين! دا خط إيده، وكمان، كاتب الاسم السرّي بتاعه. طب والرسالة بتقول إيه؟ رسالة غريبة جدًا، مش فاهمين منها حاجة! أكيد متشفرة، انت عارف إن العميل 111 كان خبير تشفير. هات الورقة دي، إما نحاول نفكها. اكتب عندك، 1 لبنة زعتر... دا معناه إنهم خاطفينه في "لبنان" دلوقتي. إيه العلاقة يا فندم؟! اللبنة أكلة لبنانية، دا غير كمان إنه مكتوب بين قوسين (الزعتر واخد السندوتش في حتة تانية). دا معناه إن هما سفّروه "لبنان". عبقري يا فندم! مكتوب كمان: 1 بطاطس صوابع، من غير كاتشب. يعني، "أنا بأمان"، لأن الكاتشب بيعني دم، والسندوتش من غير كاتشب. طب يا فندم، لو كان من غير سَلَطة؟ دي إجابة مش هتحب تسمعها! 2 فلافل طحينة بس. يعني، هو مخطوف في مكان ساحلي على البحر، لأن الأغنية بتقول: "عملنا البحر طحينة، وكتبنا عليه أسامينا." Bravo عليك! بدأت تفهم. إيه؟! 1 بيض أومليت، عيش شامي، Extra جبنة، من غير زيتون ولا فلفل؟ - يعني إيه؟! - يعني عايز فريق دعم سريع حالًا، معاهم غطاء جوي. تمام يا فندم. وهات فرقة Commandos وغواصين في المخزن دا، لأنهم قرّبوا يصفّوه. وهنعمل إيه كدا؟ أنا هأبعت رسالة لعملائنا هناك، عشان يقوموا بهجوم شامل. بعد إذنك. سلام عليكم. 111؟! انت هنا؟! آه يا ابني، وصلت من حبّة. طلبت Order الفطار اللي بعته ولّا لأ؟ أنا هأموت من الجوع. يا نهار أسود! أهم حاجة سندوتش اللبنة، ما تنساش، الزعتر واخدها في حتة تانية. دا احنا اللي هنروح في حتة تانية! دا إيه دا؟! دي، يا عزيزي، كانت مشروع شفرة "دافنشي"، واتحولت إلى شفرة حلاقة! عزيزي المُشاهد الجميل، أنا مش هآخدك من إيدك ونروح أي حتة، اقعد مكانك، كفاية المجهود العقلي اللي بنعمله أنا وانت سوا، مش ناقصة فرهدة. موضوعنا النهاردة، يا عزيزي، ليس البحث عن الكنوز، ولكن "التشفير". البشر، يا عزيزي، من بداية الحضارة احتاجوا إن هما يتبادلوا الرسايل بشكل سرّي، سواء بقى في الحروب ضد الأعداء، أو في المؤامرات الداخلية، أو حتى كمان في الحُب والغرام. لمّا كنت، يا عزيزي، صغير، كنت أحب أشوف مسلسلات المخابرات، وأحب كتابة رسالة لزمايلي البنات يعني اللي أنا معجب بيهم وكداهو، عن طريق الحبر السرّي، اللي هو حيلة الليمون الشهيرة. بينتهي الموضوع في النهاية إن البنت تاخد الورقة، ما تعرفش تقرا اللي فيها، وأمي تضربني، عشان الليمون خلص في التلاجة، وأبويا بيقفشني، عشان شغال مكوجي! عدّى المكوة جنب الليمون، قرا كل اللي جوايا! حاجة في منتهى الإحراج! طبعًا، يا عزيزي، طريقة الكتابة بالليمون، وتعدّي تحتها حرارة دي طريقة قديمة جدًا، دي من أبسط طرُق نقل الرسايل من غير حتى تشفير. بس طبعًا، الطرُق دي بتتقفش، ووسائل التفتيش بتتطور، لازم يبقى معاك الورق، بس ما حدش يفهم مكتوب فيه إيه. المؤرخ الشهير "هيرودوت" الملقب بـ"أبو التاريخ" بيحكيلنا عن أسطورة، أسطورة حاكم إغريقي اسمه "هيستيايوس"، الراجل دا، يا عزيزي، اتحط تحت الإقامة الجبرية في قصره، الفُرس حاصروه في قصره، الراجل دا احتاج إن هو يبعت رسالة سرّية، وهو في القصر بتاعه، رسالة تحث أتباعه على الثورة، عشان ييجوا يطلّعوه، فقرر يجيب أكتر عبد أمين عنده، وراح حالقله... "حلقله ليه يا (أبو حميد)؟ كان مقمّل؟" لأ، يا عزيزي، هو حلقله شعره، عشان يخلّي فروة راسه، يقدر يكتب عليها الرسالة، يفضفض بكل اللي هو عايزه لأتباعه، ويسيب العبد دا جنبه شعره يطول في الـ"سكرتة". الشعر يطول، يداري على فروة الراس، كدا الرسالة بقت مستخبية. تخيل، يا عزيزي، لو كنت أنا العبد الأمين! الراجل هيفضل محبوس ليوم الدين! هيفضل قاعد جنبي مستني الرسالة تستخبى لمدة 30 سنة! دي طريقة لنقل الرسايل، الغرض منها إن العدو ما يلاقيش معاك رسالة أصلًا، العبد كان طالع قُدّام الفُرس فُلّة، ما أعرفش طبعًا العبد اللي بيتحفرله حاجة على راسه، قال يعني هو ما عندهوش لسان يقدر يقولّهم بعد ما يطلع، لا يجيد الحفظ، ولكن يُمكن النحت عليه! البشر، يا عزيزي، دوّروا على طرُق جديدة، بحيث إن العدو حتى لو مسك الرسالة، ما يعرفش إيه اللي فيها، ما يفهمهاش. واحدة من هذه الطرُق استخدمها اليونانيين في حروبهم، كانت طريقة بتعتمد على إنك تغيّر ترتيب الحروف اللي في الرسالة، من غير ما تغيّر الحروف نفسها، ودا باستخدام جهاز معيّن كدا قديم موجود عند المرسل والمستقبِل، اسمه الـScyTale، الجهاز دا عبارة عن أسطوانة معمولة بأبعاد معيّنة، تقدر تحط حواليها الورق أو الجلد اللي مكتوب عليه الرسالة، بشكل وطريقة معيّنين، وتكتب الرسالة على الجلد المربوط. وبعد ما تفك الجواب من الأسطوانة، الحروف بتتلخبط تمامًا وتبقى مش مفهومة، ما فيش حرف جنب أخوه نفس الكلمة، انت هتكتب الرسالة على طول الأسطوانة، مش على الحزام الجلد، بس لمّا هتفك الحزام، هتلاقي الكلام ما لهوش أي معنى. بُص، يا عزيزي، على الصورة اللي قُدّامك دي مثلًا، لو قريت بالعرض، الرسالة هتبقى مكتوبة... "قابلنا في الجنينة النهاردة". بس لو قريت بالطول، بعد ما تفك الحزام، الرسالة هتبقى، يا عزيزي... الرسالة، يا عزيزي، اللي بتتكب لمّا كوعك بيقع على الـKeyboard! حاجة غير مفهومة تمامًا! ما حدش يقدر يترجمها غير الطرف اللي بيستقبل ومعاه نفس الأسطوانة. ولازم هنا، يبقى رابط الحزام بنفس الطريقة، عشان يعرف يقرا الرسالة. الطريقة دي، يا عزيزي، اتسمت... أو التشفير بإعادة الترتيب، ودا اسم عام لمجموعة من الطرُق اللي بتعتمد على هذا الـTechnique. وطبعًا هذا الـTechnique مش شرط يستخدم الأسطوانة الإغريقية اللي حكيتلك عنها. صحيح، يا عزيزي، اللي أنا حكيتهولك دا تقدم عن إن انت تكتب على قفا الناس أو على شعرها، بس برضه، يا عزيزي، لسة الموضوع مش أمان، الرسايل الصغيرة ممكن بشوية تجربة وخطأ تتفك، تلاقي شوية حروف كدا جُم جنب بعض، تتجمّع الكلمة، تترجم. وصحيح الرسايل الطويلة المعقدة ممكن تبقى أصعب شوية، بس برضه، لسة وارد تفكها، لأ، احنا كدا بقى محتاجين طريقة تشفير أفضل. تعالى، يا عزيزي، آخدك من إيدك، نطلع كام قرن قُدّام، نوصل للإمبراطورية الرومانية، تعالى أعرّفك على واحدة من أشهر وأقدم طرُق التشفير... دي، يا عزيزي، شفرة فكرتها غاية في البساطة، احنا هنبدّل كل حرف في الرسالة بحرف تاني خالص، حرف موجود بعده بعدد ثابت من الحروف الأبجدية، هأقولّك مثال، عشان نفهم مع بعض، العدد الثابت دا هو المفتاح، اللي لازم المرسل والمستقبل يتفقوا عليه، يتفقوا "احنا هننط كام حرف"، فاستنى، هأشرحلك. لو عندك مثلًا رسالة بتقول... "اهجم الساعة 9" وعايزين ندّيها شفرة القيصر، نشفّرها، مثلًا، هنتفق إن مفتاح شفرتنا رقم 5، ومعانا الأبجدية الإنجليزية قُدّامنا، كلنا حافظينها، هنروح لحرف اللي هو أول حرف في الرسالة، لو اتحركت بعده 5 خطوات في الأبجدية، هتلاقي يبقى هنبدّل هنا أول حرف من رسالتنا اللي عايزين نقولها للشفرة اللي هي وهكذا وهكذا. كل حرف هنـ"شفّت" بعده 5 خطوات، وبكدا، الرسالة الواضحة الظريفة اللي هي Attack at Nine، هتتحول إلى هذا الـPassword اللي ما حدش فاهمه قُدّامك، أهو. ابعتلي بقى الرسالة مع أي حد، يحلقوله شعره بقى، يقرروه، يروح يذيعها في الميكروفون، هيفضل الكلام ما لهوش أي معنى، طول ما ما فيش حد عارف مفتاح الشفرة، غير اللي بيبعت واللي بيستقبل. "(أبو حميد)، لو سمحت، لو سمحت يا (أبو حميد)، أني مش عايزك تستهتر بذكائي، دي شفرة شديدة السهولة، الحروف الإنجليزي دي، أولها عن آخر، كام حرف؟ هتلاقيهم بتاع 20 لـ21 حرف." 26، يا عزيزي. "أيًا كان يا (أبو حميد)، انت فاهم الفكرة، 26 حرف يعني 25 مفتاح محتمل، أنا ممكن أجرب كل المفاتيح، وأفك الرسالة بمجهودي، بالصبر والسروال!" - إيه؟! - "أستعين بالصبر والسروال." سروال إيه؟! الصبر والسلوان. الحقيقة، يا عزيزي، إن كلامك فيه الكثير من الصحة، وعشان كدا، بالرغم من إن التاريخ ذكر إن "يوليوس قيصر" كان بيستخدم هذه الشفرة في رسايله سواء العسكرية أو الشخصية، إلا إنها، بصراحة شديدة، شفرة ضعيفة وسهلة الكسر، بالذات يعني لو العدو عارف إن انت بتستخدم الشفرات دي، والحاجة الوحيدة اللي واقعة منه هي المفتاح. طبعًا، يا عزيزي، مش عايز أحكيلك عن الـPrivacy في بلاط "يوليوس قيصر"! حبيبي، كان بيقعد على فخدة "بروتس"، يحكيله كل حاجة، والباقي انت عارفه كويس! لم يكن حَذِر بالمرة! وهنا، يا عزيزي، خلّيني أقولّك على حل هذه المشكلة، إيه رأيك نعمل تعديل بسيط؟ بدل ما نتفق مع بعض على مفتاح، اللي هو زي ما قُلتلك عبارة عن رقم، اللي هو "هننط كام حرف"، تعالى نعمل مع بعض جدول كبير أشبه بالـMapping لكل حرف، هنبدّل كل حرف بحرف تاني بشكل عشوائي، بحيث اللي يقفش رقم، ما يقفشش اللي وراه، نجنن أمه! ومش هنلتزم بنفس الترتيب، ولا هننط نفس النطة. يعني مثلًا، بُص معايا على جدول كدا بيقول الآتي، تعادل الـB تعادل الـC بقى وهكذا وهكذا. كل حرف بياخد مكان أخوه. هنا، مفتاح الشفرة لم يعد مجرد رقم، دا بقى جدول كامل على بعضه. "(أبو حميد)! (أبو حميد)، أنا لسة حاسك مش بتحل المشكلة، الطريقة دي في طرحها، روش آه، لكن لمّا ناخدها لأرض الواقع، هتلاقي إن فيها مشاكل واضحة." Bravo عليك، يا عزيزي! ما شاء الله، انت في التشفير عبقري! الطريقة دي، يا عزيزي، بالفعل فيها مشكلة، لأن انت عشان تستخدمها، لازم تنقل المفتاح بتاعك نفسه للي هيستخدمها، الـKey، كل دا من غير ما يقع في إيد عدوك، ويا فرحتي! على الأقل في الأرقم كان الموضوع سهل، الراجل هتقولّه: 6، هيفهم 6 على طول، رقم خفيف، سهل أشيله في دماغي وأمشي. إنما جدول كل حرف بيساوي إيه عند أخوه، دا لا حد هيحفظه، ولو اتقفشت بيه، هيبقى فيه ريبة. كمان، فيه مشكلة تانية، انت، فرضًا، عرفت تحفظ الجدول، أو عرفت تنقله، فهل دا معناه إن انت في السليم وأسرارك محفوظة؟ بصراحة، يا عزيزي،الإجابة لأ. وعشان تعرف الإجابة لأ ليه، خلّينا ننط مع بعض كام قرن، افتح حوضك، هننط على الخلافة العباسية في "بغداد"، وفي ما يُعرف بـ"العصر الذهبي للإسلام". كتير من علماء المسلمين في هذا الوقت كانوا مشغولين بالتحليل اللغوي لـ"القرآن الكريم"، وبعضهم، يا عزيزي، ركّز على تحليل نمط تكرار الحروف في "القرآن"، في "القرآن" على وجه الخصوص، وفي اللغة العربية عمومًا، How Much The Letters Are Being Repeated? واحد من العلماء دُول، يا عزيزي، كان اسمه... الراجل دا، يا عزيزي، ليس برجُل عادي، "الكِندي"، يا عزيزي، بيُنسَب له... "رسالة في استخراج المُعمّى" "المُعمَّى" هنا بمعنى "المشفّر". "الكِندي"، يا عزيزي، كان بيأسس لعملية التحليل الإحصائي في واحدة من فقرات هذا الكتاب، لمّا قال في ما معناه إن انت لو عارف رسالة اللغة الأساسية، ومعاك الرسالة المشفّرة، فغالبًا أكتر حرف متكرر في الرسالة المشفّرة هو أكتر حرف عمومًا بيتكرر في اللغة الأصلية، وتاني أكتر حرف بيتكرر في الرسالة المشفّرة هو برضه وارد يكون أكتر تاني حرف بيتكرر باللغة الأصلية، وهكذا وهكذا. تقدر تستخدم هذه المعلومة وتفك الشفرة. الـGraph، يا عزيزي، اللي قُدّامك دا مثلًا، بيوصف معدل تكرار كل حرف من حروف اللغة الإنجليزية في النصوص الإنجليزية، واضح جدًا إن أكتر حرف، يا عزيزي، بيتكرر هو الـE، انت غالبًا خمنته لمّا فكرت، بعده، يا عزيزي، بييجي الـT، وبعدهم الـA، وهكذا وهكذا وهكذا، من الأكثر استخدامًا للأقل استخدامًا في اللغة. فلو انت، يا عزيزي، معاك رسالة طويلة جايالك من العدو، مكتوبة بشفرة القيصر، أو حتى بصورة أعقد شوية، فانت هنا تقدر تستعين بكلام "الكِندي"، والمفروض إن أكتر حرف متكرر في اللغة الأصلية يبقى أكتر حرف متكرر في الرسالة، فمثلًا، لقيت التشفير كله كله حرف تعرف إن الـL دي غالبًا ليه؟ لأن أكتر حرف باللغة الإنجليزية هو الـE، موجود في كلمات كتير جدًا، فصعب، صعب يعني إحصائيًا إن يبقى العكس في هذه الشفرة. الطريقة دي، يا عزيزي، هتساعدك إن انت على الأقل تكسّر أجزاء من الشفرة، لأن انت ببساطة، يا عزيزي، هتشوف أكتر حرف متكرر في الشفرة، هتبدّله بـE. تاني أكتر حرف متكرر في الشفرة، فليكن مثلًا هنقوم مبدلّينه، لو تفتكر، في اللغة الإنجليزي بـT. هنشوف أكتر تالت حرف متكرر في الشفرة، فليكن مثلًا هنقوم مبدلّينه بـA، لأن احنا عارفين في اللغة الإنجليزية دي المعدلات الطبيعية للحروف في الكلمات. في حالة اللغة العربية مثلًا، أكتر حرف بيُستخدم هو الـ"أ"، فأنا لمّا ألاقي الرسالة المشفرة أكتر حرف بيُستخدم فيها هو "التاء" مثلًا، هأقوم مبدّل كل تاء بألف، وأحاول بقى أستنبط القاعدة. "(أبو حميد)، بس اللي انت حكيتهولي دا طريقة لفك الشفرة، أنا دلوقتي كحد عايز أصنّع شفرة، كيف أتلاعب بالـFrequency Analisys وأستاذ (كِندي) دا ما يقفشنيش؟" عزيزي، أرجوك، اعمل بعض الـ"ستريتشات"، ووسّع حوضك شوية، هننط بعض القرون! هنوصل لعمنا "فينير" الفرنساوي. "فينير"، يا عزيزي، قعد يفكر شوية في الـFrequency Analysis، ولقى إن سبب نجاحه في فك الشفرات إن دايمًا دايمًا نفس الحرف في الرسالة الأصلية بيتحول لنفس الحرف في الرسالة المشفرة، يعني الـE دايمًا لو اتحولت هتفضل الـE على طول تتحول لـW طول الرسالة، وهوبا، الرسالة تتحل قُدّامك، أول ما تعرف الـStatistics. "فينير" قعد يفكر: "ازاي أقدر أخلّي الحرف الواحد اللي موجود في الرسالة الأصلية، يتحول لحروف مختلفة في الرسالة المتشفرة؟" أنا مش عايز حرف الـE ريحته تفوح في الرسالة، عايز أخلّي الـE يظهر في كذا صورة." وطلع، يا عزيزي، بفكرة عبقرية، وقام عاملّك الجدول اللي قُدّامك دا، دوس Pause. الجدول، يا عزيزي، اللي قُدّامك دا ثابت ومعروف،مش سرّي ولا حاجة، كل صف في الجدول فيه كل الحروف الأبجدية في الإنجليزية، وكل صف متـ"شفّت" 1 عن اللي فوقيه، بالشكل اللي انت شايفه قُدّامك داهو، كل سطر، يا عزيزي، بتبدأ من الحرف اللي بعده، فأول واحدة، تاني واحدة، تالت واحدة، وهكذا وهكذا وهكذا. عمك "فينير" قالّك: "بُص يا عم، عايز تبعت رسالة متشفرة ومتأستكة؟ اعمل اتفاق مع الراجل اللي هيستقبل الرسالة على مفتاح سرّي معيّن قصير، كلمة إنجليزي، ولتكُن مثلًا كلمة Bampoz، اللي قُدّامك دي، وبعدين، شوف الرسالة اللي انت عايز تبعتها، وكرر المفتاح دا تحتيها، لحد ما الرسالة تخلص. بُص قُدّامك، Meet Me at Park، يعني، Meert Me at Park هتبقى، اسمع بقى، يا عزيزي، عشان تركّز معايا، عشان فيه لخبطة شوية، بس حلوة، حلوة، عشان تقدر تبعت لحبيتبك رسايل من غير ما حد يقفشكم! "عرفت اللي فيها" دلوقتي، يا عزيزي، الكلمة بتاعتنا Bampoz، احنا مثلًا لو عايزين نبعت رسالة مكتوب فيها: Meet Me at Park، "قابلني في الحديقة"، هتحط تحت كل حرف المفتاح بتاعك دا بشكل متكرر، بالشكل اللي انت شايفه دا، تفضل ترص في المفتاح تحت الرسالة، لحد ما رسالتك تخلص. حلو كدا يا عزيزي؟ دلوقتي بقى، كل حرف من الرسالة الأصلية هتقوم مبدّله بحرف من اللي في الجدول، اللي هو إيه؟ التقاطع اللي فيه حرف من الرسالة وحرف من Bampoz. يا ابن الصايعة! خططت كويس ونفّذت كويس يا "فينير"! تعالى، يا عزيزي، نروح على الجدول ونفهم أكتر، احنا دلوقتي أمام الرسالة وكتبنا تحتها المفتاح، هندوّر على التقاطع بين الرٍأسي والأفقي، العمود اللي فيه حرف الرسالة، والصف اللي فيه حرف المفتاح، هو دا. يعني مثلًا، يا عزيزي، لو أول حرف من الرسالة وأول حرف من المفتاح هتروح على الجدول، رأسي أفقي الحرف هنا إيه؟ تقوم كاتبها. طب، يا عزيزي، دلوقتي، تاني حرف من الرسالة، وتاني حرف من المفتاح هنا تبقى الـE تنزل زي ما هي من فوق، تقابل الـA، يطلع الحرف برضه عادي، ما فيهاش مشكلة، زي ما موجود في الرسالة، مش مشكلة. بنلخبط، بنعرف. خُش، يا عزيزي، على تالت حرف في الرسالة بتاعتك، اللي هو بيعادل في Bampoz المفتاح بتاعنا إيه؟ الـM. تشوف عمود الـE، وصف الـE، يطلعلك شايف هنا، يا عزيزي، ما فيش حرف هيتكرر بنفس الشكل، عشان بتوع "الكِندي" ما يقفشوناش، حرف الـE ظهر في الفيلم بدورين، ابن الصايعة! مرة بقت شفرته نازلة زي ما هي، ومرة بقت شفرته ويا عالم هيطلع بأي مظهر تاني! بس كدا، يا عزيزي، احنا خلاص، نجحنا في دشملة الـFrequency Analysis، عذرًا أيتها الدولة العباسية! وما حدش هيشوف أكتر حرف متكرر في الرسالة المشفرة، ويعرف إن هو لأن أكتر حرف هيتكرر في الرسالة المشفرة هيبقى بيتكرر بشكل عشوائي تمامًا، ومش هيبقى بيمثل الـE، ولا يمثل أي دلالة! التشفير النهائي، يا عزيزي، هيكون بالشكل اللي قُدّامك دا، Meet Me at Park، لو دخّلتلها مفتاح Bampoz، تطلع الكلمة اللي قُدّامك دي، ترجم، لو تعرف! لاحظ، يا عزيزي، مش بس حرف الـE في الرسالة الأصلية، اللي نزل بـ3 شخصيات مختلفة، الـE والـQ والـD. كمان، حرف في الشفرة كان مرة جاي من حرف في الرسالة الأصلية، ومرة من حرف الـP. يعني، اللخبطة رايح جاي، لا يوجد نمط متكرر لا في الرسالة ولا في الشفرة. "الحمد لله يا (أبو حميد)، احنا كدا وصلنا لعملية تشفيرية ممتازة! أنا أقدر أقفل كدا، وأروّح وأسيبك مرتاح الضمير. أنا هأتفرج على (شادي حبشي) مع كوباية شاي، لأن دماغي تعبت!" عزيزي المُشاهد الجميل، بما إنك عرفت الشفرة، ما ينفعش تفضل عايش، بأهزر معاك، يا عزيزي! الطريقة دي، يا عزيزي، أينعم صعبة حبتين على بتوع الـFrequency Analysis، وبتعرف تعدّي الشفرات من تحت عينيهم، ولكن ليس بطريقة كاملة، افتح حوضك تاني، واستعد لوثبة تاريخية ثالثة. "هو إيه يا (أبو حميد)؟! انت دكتور نسا؟! مالك بحوضي يا عم؟! انت طول عمرك بتاخدني من إيديا ونروح القرون، الله! إيه موضوع التنطيط والأحواض والصياغات الغريبة دي؟!" عزيزي، أنا مصمم على الوثبة، اتصرّف بقى! دلوقتي، يا عزيزي، احنا هننط كام قرن قُدّام لحد ما نوصل للعالم الإنجليزي "تشارلز باباج"، "تشارلز" أدرك، يا عزيزي، إن نقطة ضعف شفرة "فينير" هي إن المفتاح بيتكرر، أي حد معاه الورقة دي وقفش حوار Bamboz، هيـ"بمبز" اللي كاتب الشفرة! بشوية مجهود ممكن يتعملوا، وخصوصًا لو كانت الرسالة المشفرة طويلة، تقدر تستنتج طول المفتاح، لأن انت لمّا بتكتب رسالة طويلة بنفس المفتاح، هتبدأ الأنماط تبان والـPatterns تتكرر، انت، يا عزيزي، لمّا تقفش النمط، هتستنج طول المفتاح، حتى لو ما استنتجتش المفتح نفسه. وهنا، يا عزيزي، نيجي للفكرة العبقرية التانية، لو أنا مثلًا معايا رسالة طويلة، وعرفت إن طول المفتاح 6 حروف، انت لو معاك رسالة طويلة، رسالة طويلة، الرسالة الطويلة دي كل شوية بتلاحظ إن فيه حروف معيّنة بتتكرر، أو مجموعة من الحروف بتتكرر كذا مرة، بتلاحظ إنها كل فين وفين كدا بتتكرر، هنا، انت تقدر تقفش حاجة مهمة جدًا، تقدر تقيس المسافة بين التكرارات دي وبعضها فتقدر تخمن طول الشفرة أد إيه. "طب يا (أبو حميد) ولمّا أقفش طول مفتاح الشفرة أد إيه، هأجيبه ازاي؟! فيه 26 حرف في اللغة الإنجليزية، هأفضل أبدّل بقى؟!" اتقل، يا عزيزي! هنا، انت استنتجت طول المفتاح، بس لسة مش معاك المفتاح نفسه، ما تستقلّش بطول المفتاح، دا مش شوية. هنا، يا عزيزي، خلّيني أودّيك للفكرة العبقرية التانية، لو مثلًا معاك رسالة طويلة، وعرفت إن طول المفتاح 6 حروف، زي المثال بتاعنا، Bampoz، المسافة من أول لتاني 6، طبعًا، يا عزيزي، هتلاقي المفتاح دا بيتكرر تاني، مش دا معناه هنا، يا عزيزي، إن الحرف الأول والسابع والـ13 والـ19، وهكذا وهكذا، كلهم متشفرين باستخدام نفس الصف في الجدول؟ يعني كلهم يُعتبروا كدا متشفرين بشفرة قيصر، بتاعة "عوّض، وحُط مكان الحرف". هنا، نقدر نعمل عليهم Frequency Analysis، الطريقة بتاعة "الكِندي"، نشوف أكتر حروف بتتكرر، وبكدا، يا عزيزي، نبقى قفشنا الحرف الأول من المفتاح. وبنفس الطريقة، يا عزيزي، الحرف التاني هو هو الحرف التامن، هو هو الـ14، وهكذا وهكذا. ما هو الطول المفتاح احنا عرفنا إنه 6، هنعمل عليهم Frequency Analysis، زي ما قُلتلك، ونقفش الحرف التاني من المفتاح. وهكذا، لحد ما نقدر نستنتج الـ6 حروف كلهم. واللي يمسك مفتاح الشفرة، يعرف يفك الشفرة. "بس، يا (أبو حميد)، أنا عندي فكرة، احنا ممكن نعمل مفتاح طويل بحجم الرسالة كلها، عشان ما حدش يقفش علينا أنماط." صح طبعًا، يا عزيزي، بس انت برضه ممكن تخلّي الـPassword بتاعة "إيميلك" أول صفحة في كتاب "شخصية (مصر)"، بس افتكره بقى، صباح الفل! المفتاح المفروض إن هو يبقى بسيط، عشان الناس تحفظه، عشان يبقى سهل النقل، وأصلًا يا أخويا لو انت عندك طريقة أمان تنقل بيها مفتاح طويل أوي كدا، ما تروح تقول للراجل الرسالة وتخلص! ليه لازم نشفّرها؟! كمان، يا عزيزي، في العمليات العسكرية، المراسلات بتبقى محتاجة تتأمّن زيادة، فالمفاتيح دي بتفضل تتغير باستمرار، الألمان مثلًا كانوا بيغيّروا مفاتيح التشفير بتاعتهم مرة كل يوم في الحرب العالمية التانية، عشان حتى لو "الحلفاء" عرفوا يفكوا رسايل ليهم النهاردة، ما يفكوش رسايل بُكرة وبعد بُكرة وأول امبارح. "طلّعتم على مفتاح الشفرة؟! طب احنا غيّرنا الكالون!" برغم، يا عزيزي، اللي أنا بأقولهولك دا، بس خلّيني أقولّك Plot Twist أوحش بكتير، Actually, Actually, Actually، "الحلفاء" في الحرب العالمية التانية عرفوا يلاقوا طريقة يفكوا بيها الشفرة الألمانية كل يوم، "بلدنا في القلوب متشالة" ولكن طبعًا، يا عزيزي، القصة دي محتاجة حلقة تانية خالص. التشفير، يا عزيزي، وفك التشفير، زي ما انت شايف كدا، تاريخ طويل وصراع بين الناس اللي عايزة تنقل رسايل والناس اللي عايزة تفكها، والناس اللي في النُص عايزة تعرف حاجات مش المفروض تعرفها! صراع مستمر لحد دلوقتي. بس دلوقتي، يا عزيزي، طرُق التشفير الرياضية مش بس اتطورت، لأ، كمان أدوات التشفير وفك التشفير اتطورت، الناس كانت بتكتب زمان رسايل بإيديها، وتفكها بإيديها، شوية، بقى يستخدموا كمبيوترات ميكانيكية، اللي هي أد الأوضة دي، وبعدها، كمبيوترات رقمية، وهنا، يا عزيزي، خلّيني آخدك لآخر قفزة إلى الأمام، التشفير الرقمي. سنة 1997، "المعهد القومي الأمريكي للمعايير والتكنولوجيا" عمل مسابقة بين متخصصين التشفير، هدف المسابقة الوصول إلى Algorithm تشفير المعهد يعتمد عليه باعتباره... عشان نشوف، يا عزيزي، بعد اختبارات كتير، عالمين من "بلجيكا" بيفوزوا، "جوان دايمان" و"فنسنت ريجمن"، والمقترح بتاعهم، يا عزيزي، بقى هو الـAES. لحد هذه اللحظة، تقدر تعتبر إن طريقتهم في التشفير آمنة تمامًا، ولحد دلوقتي، يا عزيزي، ما حدش عرف يكسرها بشكل متكرر، إلا بقى لو المفتاح دا اتسرب. ودي مشكلتك انت، حلها، كل واحد ياخد باله من مفتاح شفرته! فيه راجل غريب معاه شنطة سودا، قام قايلّك: "ورّيني مفتاح شفرتك، أودّيك لماما." اوعى تسمع كلامه، وقولّه: "ماما قالتلي ما توريش مفتاح شفرتك لحد." قد تظن، يا عزيزي، إن التشفير دا كان أيام الجاسوسية والحروب العالمية والحروب البلدي دي، بس التشفير مُستخدم النهاردة بكثافة جدًا في عالمنا المعاصر، مثلًا، تشفير بياناتك على الـHard Disk، تشفير الـData اللي بتنتقل عبر الإنترنت، من كتر استخدام التشفير، ساعات بتلاقي الـProcessor نفسه، اللي هو الـHardware، الحديدة نفسها، فيها دواير كهربية مصممة مخصوص عشان تنفّذ عمليات التشفير بشكل سريع جدًا، الـAlgorithm دا، يا عزيزي، حتى الآن يُعتبر آمن، معاه حزام الـAES. الحقيقة، يا عزيزي، برغم إن الدنيا تمام، وكله حلو وجميل، إلا إن العلماء، زي ما تقول كدا، يا عزيزي، خايفين شوية. "يا ساتر يا رب! ليه يا (أبو حميد)؟!" العلماء، يا عزيزي، زي ما انت عارفهم، دايمًا خايفين من المستقبل، وآراؤهم تجيب اكتئاب! والحمد لله إن هما كدا، عشان يخلّونا ناخد بالنا! العلماء، يا عزيزي، خايفين جدًا من الـQuantum Computer، الحواسيب الكمية، هما شايفين إن لو طلعت الحواسيب الكمية، ممكن تكسر الشفرات، ودا، يا عزيزي، من الحاجات اللي بترعب بتوع البيتكوين والإيثيريوم، الـQuantum Computer، "جوجل" أول ما عملت الـChip بتاعتها، سعر البيتكوين نزل، لأن هي عملات مشفرة، لمّا ييجي الـQuantum Computer، ربنا يستر على العملات المشفرة! فيه قلق في الحتة دي يعني، دا اللي بأحاول أقولهولك. لحد دلوقتي، يا عزيزي، لا يوجد تطورات مرعبة في عالم الـQuantum Computer بالنسبة للجماعة دُول، وبالنسبة لجماعة التشفير عمومًا يعني، لحد دلوقتي، الـAES، على حد فهمي، لسة محافظ على مكانه. شفرة الـAES بتاخد كتير من الأفكار التاريخية، اللي اتكلمنا عنها، ومشاكلها وعيوبها وحلولها، وبتدمجها في مجموعة من الخطوات المتتالية. كمان، يا عزيزي، الـAES بيتعامل في عالم الكمبيوتر، اللي هو عالم الـBinary Numbers، وهناك كل الحروف بتحولها لأرقام، عشان تعرف تتعامل معاها، مثلًا، واحدة من الـStandards بتاعة هذا التحويل اسمها Ascii، الـAscii Code، الجدول اللي قُدّامك دا بيقولّك مثلًا إن انت لو عايز تعبّر عن حرف فانت محتاج تستخدم الـBinary بتاع رقم 65، اللي هو... طيب، لو عايز دا رقم تاني خالص، الـBinary بتاعه 97، وهكذا بقى، يا عزيزي، لكل الرموز والحروف في كل لغات العالم. الـAscii بيعبّر عن كل رموز بتمانية Bits، اللي هما يعني 1 بايت، ولكن طبعًا دا ما يكفيش كل لغات العالم. عشان كدا، يا عزيزي، عندنا Standards أخرى غير الـAscii، بس خلّينا نكمل معاه، بما إننا بنحاول نفهمه. ببساطة، يا عزيزي، احنا عايزين أي نظام تشفير يمتلك صفتين أساسيتين... الـConfusion، يا عزيزي، معناه ببساطة إننا عايزين نخلّي العلاقة بين النَص المشفر وبين مفتاح التشفير علاقة معقدة قدر الإمكان، لو 1 بت بس اتغير في المفتاح، مش عايزين يتغير 1 بت بس في النَص المشفر اللي هنطلّعه، لأ، احنا عايزين حاجات كتير أوي تتغير فيه، عايزين نشوّه أمه! على الناحية التانية، يا عزيزي، احنا عندنا الـDiffusion، دا، يا عزيزي، بيربط العلاقة بين النَص الأصلي والنَص المشفر، مش المفتاح، والهدف منه برضه إنه يخلّي هذه العلاقة علاقة معقدة، الـ1 بت اللي هناخده في النَص الأصلي لمّا يتغير، تتدشمل ملامح النَص المشفر! مش عايز أعرفه! مش عايز تغييرة مقفوشة والشفرة تتفك! باختصار، يا عزيزي، تاني، الـDiffusion هو إن انت تعقّد العلاقة بين النَص الأصلي والنَص المشفر، Confusion وDiffusion. الخطوات المعقدة لـAlgorithm الـAES متصممة مخصوص عشان تحقق الصفتين دُول بالإضافة لشوية حاجات تانية. وقبل ما تقوم تجري، وتفتكر إن احنا خلاص وصلنا للشفرة المثالية، خلّيني أكمل، الـAES، يا عزيزي، لسة عنده نقطة ضعف، نفس نقطة الضعف اللي كانت موجودة في طرُق كتير قبل منه، أبعت المفتاح ازاي؟ الـAES، يا عزيزي، قوي، بس بافتراض إن الاتنين معاهم نفس المفتاح. بس تخيل، يا عزيزي، إن انت عندك أموالك الطائلة اللي موجودة في بنوك "سويسرا"، وبتبعت بياناتك الحساسة عن طريق الإنترنت، ومش عايز حد يسرق بياناتك ويسحب ثروتك المهولة، فحتى لو انت مشفر كل حاجة بالـAES، دا ما لهوش لازمة، لو مش هتعرف تبعت المفتاح بشكل آمن! الحقيقة، يا عزيزي، دي مشكلة في عيلة كاملة من عوائل طرُق التشفير، اسمها... دي، يا عزيزي، بتحتاج نفس المفتاح يكون موجود مع الطرفين، هنا، يا عزيزي، الحل هو إن المفتاح بتاعنا يبقى Public، هنقول للناس: يا جماعة، المفتاح بتاعنا، اللي عادةً بيكون مستخبي، ومتداري، مش باين، بقى Public، قُدّام الناس، ورينا بقى هتفك الشفرة ازاي؟! لو حاسس، يا عزيزي، إن أنا بأهزر، ازاي الواحد يمشي بالـPublic-Key بتاعه، خلّيني أفهّمك قصدي إيه. خلّيني، يا عزيزي، أعرّفك على عيلة تانية من عائلات التشفير، "ألجورذمات" تشفير اسمها... وأشهر واحد فيهم، يا عزيزي، هو... فكرتها، يا عزيزي، باختصار، كالتالي، كل واحد هيبقى عنده مفتاحين، الأولاني Public-Key، قُدّام الناس، والتاني Private-Key. الـPublic-Key دا، تنشره على العلن، على النت، تحطه في يفط، براحتك، دا، زي ما تقول كدا، بيتحول إلى الـAccount بتاعك، الـInstapay بتاعك، أي حد عايز يبعتلي رسالة، يعملّها Encryption بالـPublic-Key دا، شفّر يا آبا، وابعت! "يا نهار أسود يا (أبو حميد)! طب ما كدا الأعداء ممكن يشوفوها ويعرفوها!" آه، يا عزيزي، بس برضه، ما حدش هيكسر الشفرة، الشفرة بتاعتك ما بتتكسرش غير بالـPrivate-Key بتاعك انت بس، ودا انت المفروض ما تكونش مدّيه لأي حد. "(أبو حميد)، أنا مش فاهم أي حاجة! يا عزيزي، الـPublic-Key دا بيعرّف يشفر بس، إنما ما يعرفش يفك الشفرة، عشان كدا، يا عزيزي، اسمها Asymmetric Key، واحد بيشفر، وواحد بيفك، شفرة بروحين. لو انت، يا عزيزي، عايز تبعت رسالة لواحد صاحبك، هتقولّه: "ابعتلي الـPublic Key بتاعك." فيروح باعتهولك، تقوم مشفر انت بيه الرسالة اللي عايز تبعتهاله، وتبعتهاله برضه في العلن عادي، ما يضرش، توصلّه هو، ما حدش يقدر يفك الشفرة دي بالـPublic-Key دا، غير الـPrivate-Key اللي معاه. بمعنى أو بآخر، العالم كله يقراها، بس هو الوحيد اللي يفهمها بالـPrivate-Key بتاعه دا. "(أبو حميد)، ما تآخذنيش في السؤال، بس إيه الأساس العلمي للكلام اللي انت بتقوله دا؟" هو فيه، يا عزيزي، غيرها؟ الرياضيات. "(أبو حميد)، ما تآخذنيش، بصراحة، وانت بتشرح كداهو، أنا حسيت إن أنا تايه شوية، فقُمت رايح لـChatGPT وسألته سؤال، لقيته بيقولّي إن نظام الـRSA دا اتطور أساسًا قبل الـAES، وكمان، متطور قبله بسنين، فليه بقى ما بنستخدمهوش، وبنستخدم الـAES؟" والله، يا عزيزي، الإجابة على هذا السؤال هتكون آخر حاجة في هذه الحلقة. السبب، يا عزيزي، هو إن الـAES سريع جدًا، سريع جدًا جدًا جدًا، تعرف تستخدمه في تشفير كمية ضخمة من البيانات بسرعة كبيرة. بينما الـRSA مش بنفس السرعة الفائقة دي، مناسب أوي لحاجات معيّنة، زي مثلًا إن هو ينقل مفتاح الـAES، بس مش هو هيكون أنسب حاجة عشان يشفر كميات ضخمة من البيانات، وخصوصًا، لو كان على نطاق واسع. هنا، يا عزيزي، عشان دماغك ما تفرقعش منّي، هنوصل لنهاية الحلقة، حلقتنا اللي بتتكلم عن الصراع الطويل بين الناس اللي بتخترع شفرات والناس اللي بتحاول تفكها، صراع دخل فيه الذكاء والفلسفة والدين في ألعاب عقل طول الوقت، صراع دخلت فيه الرياضيات، لحد ما قررنا إن هي اللي هتكمل فيه لوحدها. صراع الشفرات مهم جدًا في الهندسة والصناعة والسياسة، وفي الاقتصاد وفي إدارة الحروب والجيوش والدم! رحلة، يا عزيزي، ممتدة لآلاف السنين، ولسة ما انتهتش، لسة شغالة لحد هذه اللحظة، وهتفضل شغالة. التشفير، يا عزيزي، حاجة من الحاجات الخالدة بخلود البشر، ليه يا عزيزي؟ لأن، ببساطة، دايمًا البشر عندهم أسرار. بس كدا، يا عزيزي. أخيرًا، وليس آخرًا، ما تنساش تشوف الحلقات اللي فاتت، تشوف الحلقات الجاية، تنزل تبص على المصادر، لو احنا على الـ"يوتيوب"، نشترك على القناة. تعرف، يا عزيزي، من أروع الشفرات اللي أنا شُفتها في حياتي؟ كانت الشفرة اللي استخدمناها في حرب أكتوبر، لمّا قررنا إن احنا هنزاول الإسرائيليين باللغة النوبية، لغة مش مكتوبة، الجنود المصريين مقضيينها محادثات، وفيه ظابط إسرائيلي بيشد في شعره! دا، يا عزيزي، ما كانش "ألان تورينج"، دا "محمد منير"، وما يتفكش غير وانت عامل كدا!